Slik skal regjeringa hindra at granulat frå kunstgrasbanar endar opp i naturen

Gummigranulat frå kunstgrasbanar er ei av dei største kjeldene til spreiing av mikroplast i Norge. No har regjeringa vedteke ei forskrift med ei rekkje krav som skal hindra denne forureininga.

– Plastforureining i naturen er eit stort problem, både på land og i havet. I Norge endar meir enn 1500 tonn gummigranulat frå kunstgrasbanar i naturen kvart år. Difor gjennomfører vi no eit nytt regelverk som skal redusera denne forureininga med over 90 prosent, seier klima- og miljøminister Sveinung Rotevatn i ei pressemelding.

Tett kant rundt banen

Blant dei viktigaste tiltaka regjeringa no gjer for å hindra at dei små, svarte plastkulene kjem ut i naturen, er å stilla krav til fysiske barrierar rundt banen. I tillegg vert det nye krav til snørydding og behandling av snøen som inneheld granulat, og tiltak for å hindra at spelarar og dommarar spreiar granulat når dei forlét banen.

Når det kjem til rydding av snø, så skal den ansvarlege for banen sørga for at snø som vert rydda av banen vert deponert på eit eige område. Dette området skal også ha ein tett barriere som sikrar at granulatet held seg på det området.

Eigarane av banen skal òg vurdera om det går an å bruka erstatningsmateriale, og gjera det der det er mogleg.

– Vi tar no eit stort skritt for å redusera ei av dei største kjeldene vi har til mikroplastforureining. Samstundes innfører vi overgangsordningar som skal gjera det enklare for kommunane og idrettslaga som eig desse banane, å gjennomføra tiltaka, seier Rotevatn.

Blant anna vil dei mest kostnadskrevjande tiltaka fyrst tre i kraft når banane skal rehabiliterast. Det same gjeld for banar som har fått byggjeløyve etter plan- og bygningslova før reglane trer i kraft.

– Dette vil redusera og forskyva dei høgaste kostnadane fram i tid, skriv regjeringa.

Den nye forskrifta trer i kraft 1. juli i år.

Fakta: krav til idrettsbanar

Utandørs idrettsbanar der laust fyllmateriale i plast vert nytta skal ha:

a) ein fysisk barriere rundt idrettsbanen som hindrar at granulatet vert spreia utanfor banen. Minst 20 centimeter av barrierens høgde, målt frå bakken, skal vera tett.

b) løysingar for handtering av drensvatn og overvatn som sikrar oppsamling av granulat slik at det ikkje vert spreia utanfor banen.

c) tiltak som hindrar at granulat vert spreia utanfor banen via brukarar av banen.