Må truleg byggja tre nye brannstasjonar

Den nye brannstasjonsstrukturen vil mogleg sjå annleis ut, og verta mykje dyrare, enn det kommunestyret såg for seg i fjor. Kanskje må saka opp til ny handsaming.

I juni 2020 vedtok kommunestyret ny brannstasjonsstruktur for Kvinnherad. Konklusjonen vart at Husnes, Rosendal og Ølve skulle behaldast som fullverdige brannstasjonar, medan Uskedal skulle «vidareførast minst som i dag». Kommunestyret bad dessutan om ei eiga sak om kva kostnaden vert for at Uskedal og Halsnøy skal ha «mannskap og utstyr nok til at dei realistisk kan klara å starta røykdykking på eiga hand». Varaldsøy, Åkra og Fjelberg skulle ombyggast til mindre stasjonar med framskotne einingar.

Ølve og Rosendal har tidlegare fått nye, flotte stasjonar, medan ny hovudbrannstasjon på Husnes er under bygging no. På Halsnøy er tanken å byggja om eksisterande stasjon. I mars slo Arbeidstilsynet fast at denne stasjonen må byggjast med komplette reine og skitne soner.

Også i Uskedalen er utgangspunktet den noverande bygninga.

– Men vi vil prøva å løfta taket, og dermed kunna nytta heile 2. etasje, fortalde Erlend Bøyum frå eininga Prosjektering og utbygging i ei orientering til Planutvalet førre veke.

Byggja ved kai

For at ikkje Halsnøy og Uskedal skal bli veldig dyra å byggja om, vurderer ein no om brannpersonellet derifrå skal reisa til Husnes når dei er ferdige med oppdraga sine, og vaska seg sjølve og alle klede og bilar der, før dei køyrer reine heim igjen.

– Utfordringane våre no ligg på Fjelberg, Varaldsøy og i Åkra. Derifrå er det for langt til Husnes. Desse må eventuelt byggast om med reine og skitne soner, og med fire garderobar. Stasjonane i dag er ikkje i nærleiken av krava. Difor ser vi heller på å byggja nye stasjonar. Brannsjef Atle Josdal ynskjer å ha dei ved sjøen, i tilfelle dei får brannbåt, opplyste Erlend Bøyum.

Arbeidstilsynet har likevel tilrådd at kommunen, saman med bedriftshelsetenesta og vernetenesta, lagar ei risikovurdering, og med bakgrunn i den analyserer om det finst andre moglege løysingar enn å byggja tre heilt nye stasjonar.

– Men akkurat no har vi ikkje andre løysingar enn å byggja nytt. Så det vert nok ein del høgare kostnad enn vi såg for oss, understreka Bøyum.

Utvalsleiar Stein Olav Ølvestveit (Sp) konstaterte at det blir ein kostnadssprekk i saka.

– Eg ser jo at dette dreiar seg om meir pengar enn sist vi hadde saka oppe til politisk handsaming. Det hadde vore lurt å koma med eit estimat over kva dette vil kosta, sa han.

– Det er noko vi vil jobba med framover, lova Erlend Bøyum.

Ny handsaming

Asbjørn Skår (Ap) undra om ikkje den nye informasjonen bør føra til at saka må opp i kommunestyret på nytt. Den tanken var ikkje sektorleiar Sigbjørn Øye framand for.

– Kommunestyret vedtok at dei minste stasjonane skulle rustast opp for 4 millionar kroner kvar, og dessutan lokaliserast der dei er i dag. Men på Varaldsøy har dei eit skur, og vi har kanskje lyst å etablera på ny plass, gjerne ved kaien, sa han.

– Når vi ikkje klarar å levera på korkje økonomi eller plassering, så er det kome opp ei ny sak, understreka Øye.

Marianne Nordhus (Sp) tykte det høyrdest fornuftig ut både med stasjonar ved kaiar og brannbåt. Men førebels er ho mest spent på kommunen si risikovurdering, som også må godkjennast av Arbeidstilsynet.

– Dei ville ikkje seia kva vi skulle gjera, men viss vi kjem med noko, så kan dei seia ja eller nei. Det er utfordringa vår, opplyste Erlend Bøyum.