Bjørnevik best i april – har klatra heilt opp i ryggen på Keilen

Det er uhyre tett i toppen av Grenda-ligaen når det no står att fem serierundar av Premier League.

Øyvind Bjørnevik og hans «Bamsebukt XI» tok innersvingen på Nils Boge Seeberg og hans «Mario Magnifico» i den siste april-runden av Fantasy Premier League. Med 272 poeng i årets fjerde månad, vart den utflytta halsnøykaren aprilvinnar i Grenda sin Fantasy-liga.

Jaktar bestenotering

Men viktigare enn det, Bjørnevik la også press på ligaleiar Bjarte Keilen før dei siste fem serierundane. No skil det berre fire poeng mellom Keilen på første plass og Bjørnevik på andre.

– Planen er å sikra ein så god plassering i verda som mogleg. Om det samstundes føre meg til topps i Grenda-ligaen, vil det vera ein bonus, seier Bjørnevik.

Ein bonus som i så fall vil sikra han ein fotballtur til England.

Kanskje er det ikkje så rart at Bjørnevik jaktar ein høg totalplassering. I skrivande stund ligg han på ein imponerande 2.718. plass av verdas 8,2 millionar Fantasy-spelarar. Om det ikkje går skeis i dei neste fem rundane, betyr det at han stormar mot ei ny bestenotering. Øyvind vart nemleg nummer 6.243 i verda tilbake i 2018/19-sesongen.

Kapteinsval

For å slå det vil Øyvind køyra ei litt forsiktig tilnærming i sluttspurten.

– Det vert nok ein konservativ strategi med lite gambling i kapteinsval og andre val elles. Samstundes held eg eit auga med lag som har noko å spela for i innspurten, det plar ofte vera utslagsgivande på denne tida av sesongen, seier Øyvind.

Bjarte Keilen, som har trona øvst på tabellen ei god stund no, har fått med seg at «Bamsebukt XI» stadig kjem tettare opp i ryggen på han.

– Eg ser at han har eit faretrugande sterk lag. Men eg skal så klart gjera mitt beste for å halda han bak heilt inn. Skal eg klara det så tenkjer eg at det vert veldig viktig å treffa på kapteinsvala i innspurten, seier Bjarte.