Opnar opp for meir nærkontakt for fullvaksinerte

Regjeringa høyrer på innspela frå Folkehelseinstituttet og lettar no på råda for fullvaksinerte.

– Vi har stadig sikrare kunnskap om at vaksine beskyttar godt mot å bli alvorleg sjuk og mot å smitta vidare. Den kunnskapen må vi bruka til å letta på tiltak der det er mogleg, seier helse- og omsorgsminister Bent Høie på onsdagens pressekonferanse.

Fullvaksinerte

Her la regjeringa fram nye råd for dei vel 310.000 innbyggjarane i landet som i skrivande stund er fullvaksinerte. Blant anna kan dei no sjå vekk frå éin-meters-regelen når dei er heime eller på besøk hos andre.

– I den privat heim kan fullvaksinerte ha nær sosial kontakt med andre fullvaksinerte. Dei kan også ha nær sosial kontakt med uvaksinerte som ikkje er i risikogrupper, seier Høie.

Men sjølv om beskyttelsen er god, er det likevel mogleg for vaksinerte å bli smitta av Covid-19. Det er også mogleg for vaksinerte å smitta andre. Difor må fullvaksinerte framleis følgja dei same retningslinjene som dei uvaksinerte ute i det offentlege.

Like reglar ute

– Ute blant folk kan ein ikkje vita om det er uvaksinerte personar i risikogruppa i nærleiken. Så lenge det er mange som er uvaksinerte i samfunnet, og sidan vaksinerte i nokon tilfelle kan bli smitta og smitta andre, må råd og reglar vera like for alle i det offentlege rom, seier Høie.

Helseministeren sa også at regjeringa no jobbar med ei nasjonalt koronasertifikat, som vil visa informasjon om vaksinestatus, gjennomgått covid-19 og nyaste teststatus. Det kan føra til at det også blir oppmjukingar i tiltak for dei so har dette sertifikatet i orden.

– Vi ser også på kva vaksinestatus skal ha å seia for karanteneplikt, seier Høie.

Her der råda for dei fullvaksinerte:

* I private heimar og i bilen kan fullvaksinerte ha nær sosial kontakt (under 1 meter) med andre vaksinerte sjølv om dei er i risikogruppa.

* Fullvaksinerte kan ha nær sosial kontakt med uvaksinerte som ikkje er i risikogruppa.

* Fullvaksinerte bør framleis halda god avstand til uvaksinerte i risikogruppa som dei ikkje bur med.

* Ute blant folk (i det offentlege rom, inkludert offentleg transport) er det uendra råd og reglar. Dette gjeld for eksempel råd og reglar om avstand, tal, hygiene og bruk av munnbind.