Set opp testtelt ved Husnestunet

Frå måndag av opnar Kvinnherad kommune eit eige telt for å kunne gjennomføra koronatesting.

Måndag 17. august blir teltet tatt i bruk, blant anna fordi Folkehelseinstituttet har vedteke at ein no kan testa seg for covid-19 om ein mistenkjer at ein kan vera smitta. Testkriteria blir endra for at alle som sjølv mistenkjer at dei er smitta av covid-19 bør få høve til å testa seg utan å bli vurdert av lege først, melder Kvinnherad kommune.

Telt

Kvinnherad kommune set i helga opp eit telt på Husnes ved «rundkøyringa» nedanfor sjukeheimen. Det blir også opna ein koronatelefon der ein må bestilla time før prøvetaking.

– Det er viktig at alle som no trur at dei kan vera smitta, eller har forkjølingsliknande symptom, nyttar høve til å testa seg, skriv kommunen i ei pressemelding i samband med testteltet.

Koronatesting er gratis og ein får prøvesvar etter 2-3 dagar. Det vert oppmoda tuk koronatesting for alle med nyoppstått luftvegsinfeksjon eller andre symptom på covid-19, samt alle som kan ha blitt smitta med Covid-19, anten som nærkontakt eller etter utanlandsreiser

– Andre grupper kan testast etter vurdering av lege. Nokre gonger må ein ta testen ein gong til, men det er det legen som avgjer, understrekar kommunen.

Koronatelefonen nr. 908 60 166 er open måndag til fredag klokka 08.00 til 10.00 og er betjent av ein sjukepleiar. Ein vil få time same dag, opplyser kommunen.

Slik går du fram:

1. Ha klart personnummer og grunngjeving for kvifor du vil ta testen.

2. Ring koronatelefonen og avtal time.

3. Møt opp i teltet i bil presist til avtalt tid.

4. Testen blir utført og merka med namn og personnummer. Denne blir så sendt til Haukeland.

5. NB: Fram til prøvesvar føreligg må du halda deg heime i karantene. Du kan venta prøvesvar innan 4 dagar på: https://helsenorge.no/ (logg deg inn)

6. Viser koronatesten påvist resultat* får du telefon frå kommuneoverlegen. Får du ikkje telefon innan 4 dagar, kan du rekna deg for frisk og gå på arbeid/skule som vanleg dersom du er symptomfri.

7. Har du alvorlege luftvegssymptom er du nøydd til å ringa den vanlege legetelefonen 116117, eller dersom akutt forverring ring 113 og hugs å sei frå om symptoma!

– IKKJE møt opp på legekontoret der sårbare pasientgrupper kan opphalda seg dersom du har luftvegssymptom. Hugs at dersom du er smitta med Covid-19 blir alle som oppheld seg på legekontoret samstundes som deg, (personalet og pasientar) sett i karantene, understrekar.

*Påvist resultat betyr at ein har funne viruset hos deg.

Lurer du på symptom på Covid -19? Sjekk hos Folkehelseinstituttet!