Reagerer på at solcelleanlegg vert droppa

For å spara pengar, vert det ikkje installert solcelleanlegg på taket til Kvinnherad Arena. Det reagerer Miljøpartiet Dei grøne på.

Planutvalet fekk ei orientering om planlegginga av Kvinnherad Arena i møtet førre tysdag. Då kom det fram at kommunen etter anbodsprosessen mangla 43,5 millionar kroner for å få finansieringa til å henga i hop. Seinare har Sparebankstiftinga løyvd ytterlegare 4,5 millionar kroner, samstundes som prosjektgruppa har gjort einskilde kostnadskutt.

– Vi har gått nøye gjennom kor vi kan ta ned kostnadane, sa Kaia Olsen Tjoflåt.

Blant moglegheitene er å redusera tribunekapasiteten, samt å ta vekk solfangarane som skulle vera på taket. Begge deler kan ettermonterast.

– Men vi manglar framleis 18,8 millionar kroner for å vera i mål med finansieringa, sa Tjoflåt, og la til at totalkostnaden no er kalkulert til 167,3 millionar kroner.

Tjoflåt opplyste at ein til og med har vurdert å avlysa anbodskonkurransen. Men konklusjonen vart at tilbodet frå Leigland bygg faktisk er godt, og at det ikkje er nokon garanti for at prosjektet vert billegare i ein eventuelt ny anbodsrunde.

Driftskostnadane

Jostein Saghaug (MDG) reagerte på at solcelleanlegget ser ut til å forsvinna.

– Det forundrar meg at når ein ser på kvar ein kan spara pengar, så tek ein vekk det som vil gje reduserte driftskostnader. Det undrar meg at ein i det heile kan tenkja i ei slik retning. Eg blir litt opprørt, sa han, og slo fast at kommunen må læra seg å byggja for framtida.

Kommunedirektør Ragnhild Bjerkvik kontra at ein absolutt har sett på driftskostnadane.

– Det er kost/nytte-vurderingar heile vegen, understreka ho.

Sektorleiar Sigbjørn Øye var samd i at det er viktig med grønt skifte og å spara driftskostnader.

– Men det finst også andre løysingar, til dømes jordvarme. Og så ser vi på eit prosjekt med å nytta fjernvarmen frå Hydro, sa han.

Øye la til at taket uansett blir bygd for å tåla solceller.