Drog ut for å møta publikum

Kvinnherad kulturskule inviterte til tre korte konsertar i Husnes Storsenter på laurdag.

Totalt fire grupper deltok på konsertane; tre strykeorkester og eit lite kor. Dei såkalla «pop up»-konsertane var meint å vera eit plaster på såret for alle dei vanlege arrangementa som har blitt korona-avlyste det siste året.

– Vi elskar å spela for folk, det er det som er heile konseptet vårt. Vi ynskjer å spela og synga for å gleda andre, sa fiolinlærar Olena Pasichnyk.

I den siste konserten var ho dessutan dirigent for koret som bydde på songar som «Eventyr» og «Langt å gå».

– Vi hadde også ein slik «pop up»-konsert i haust, og det var ein suksess. Når vi får lov til å opptre, så grip vi sjansen. For no har vi ikkje kunne ha vanlege konsertar på over eitt år, fortalde Olena Pasichnyk.

– Så no var de veldig gira på å opptre igjen?

– Ja, veldig. Og når publikum ikkje kan koma inn til oss, så går vi i staden ut til dei, smilte dirigenten.