Politiet held fram med vitneavhøyr og åstadundersøkingar denne veka

– Det vil nok gå ei tid før vi er heilt i mål med etterforskinga, seier lensmann Sigurd Børve i Kvinnherad lensmannsdistrikt.

Ein mann i 40-åra vart laurdag varetektsfengsla i fire veker med brev- og besøksforbod, sikta for drap på 42 år gamle Renate Strand Normann på Varaldsøy.

Torsdag kveld rykte store politiressursar ut til Varaldsøy etter å ha blitt varsla av AMK om funn av ei død kvinne utandørs.

Politiet fekk raskt kontroll på ein mann etter at dei kom til staden klokka 21.40 torsdag kveld. Mannen vart i løpet av natta frakta til politihuset i Bergen, og seinare sikta for forsettleg drap.

Sentral gjenstnad

Kriminalteknikarar frå Vest politidistrikt gjennomførte åstadundersøkingar på Varaldsøy fredag, og politiet har avhøyrt fleire vitne.

– Vi har avhøyrt ein god del personar i tilknyting til hendinga, og har framleis fleire oppgåver som skal gjerast. Vi skal vidare ha fleire åstadundersøkingar og avhøyra fleire personar. Sjølv om vi føler at vi har grei oversikt på situasjonen, så står det att ein god del etterforsking. Så det vil nok gå ei tid før vi er heilt i mål, seier lensmann Sigurd Børve.

Laurdag sendte politiet ut pressemelding der dei i samråd med familie offentleggjorde namnet på den avdøde, og i tillegg la fram at dei hadde teke beslag i det dei trur er drapsvåpenet. Eit sentralt funn, i følgje Børve.

– Vi har funn ein gjenstand vi knyter til den straffbare handlinga. Gjenstanden vil bli undersøkt av kriminalteknikarar, og sikra materiale vil bli sendt vidare til analyse, seier Børve.

Politiet vil ikkje gå ut med detaljar kring gjenstanden som er funnen. Dei vil heller ikkje dela informasjon frå vitneavhøyr.

– Vi er litt ulne med å gå ut med detaljar frå vitneavhøyr. Det har med andre vitne å gjera, at dei skal koma med sine forklaringar utan å fått informasjon frå oss, seier Børve.