Barnehage- og skulestruktur

Barnehage-skulestruktur, her trengs fleire omgrepsavklaringar, til dømes: kva er ein dårleg skule?

Dette er ei stor og kompleks sak, som vi må bruka «kløkt» og god tid på for gjera vedtak. I høve saka som er lagt fram frå administrasjonen og forslag og uttalar frå Senterpartiet, er det fleire omgrepsavklaringar som må gjerast.

Frå administrasjonen si oppsummering av høyringane, sitat: «Dei er leste, vurderte og nokre er av ein slik art at dei er tekne med vidare». Til det siste, kva er kriteria for å bli tekne med vidare?

Underteikna sende høyringsuttale som politikar og uttalte som innspel at ein måtte vurdere samfunnsøkonomiske konsekvensar, både ved at skule/barnehage blei verande i ei bygd eller det ville bli nedlegging.

Eg kan ikkje sjå at dette er teke omsyn til i administrasjonen si utgreiing eller innstilling.

Min konklusjon: Uttalen min var såleis ikkje av ein slik art at ein (les administrasjonen) ville ta det med vidare!

Dette vil eg hevde er ein stor mangel og feil å ikkje gjera slike vurderingar.

Kven vil flytte til, eller heller, kor mange vil flytte frå ei bygd der det ikkje er barnehage og/eller skule. Der foreldre ikkje «får kvardagen til å gå i hop»?

Ved færre innbyggjarar, vil butikken bli nedlagt?

Vil ein kunne satse på overnatting, restaurant eller badestrand på Sunde, m.v.?

Dette er viktige vurderingar og avklaringar som må gjerast, før ein snur om på barnehage- og skulestruktur i slikt omfang som kjem fram både i innstilling og alternativt forslag om.

Kva er ein dårleg skule?

Kva er målet med forprosjekt frå hausten ved nedlegging av Sunde skule, dersom ein gjer vedtak om det allereie i mai 2021?

Når administrasjonen vel å endra si innstilling om struktur vel å dela opp med 1.-4. klasse ved nærskulen og 5.-7. til ein storskule, skulle ikkje saka då vore til ny høyring?

Kva då med fagmiljø for lærarar og borna? Kva med sparing (økonomi) på vedlikehald, og ekstra skuleskyss?

Når ein les i avisene, er det mange som har meiningar om saka, mange ulike og sprikande meiningar. Nokon vil leggja ned skulen i ei bygd, men vil at barnehage skal bli igjen. Kva då med oppveksttanken, med den nærleik som desse bygningane har?

Det er nokon som uttalar at bygdene ikkje skjønar språket til politikarane og administrasjonen. Kanskje det er omvendt, slik eg ser det, er det lite ein har teke omsyn til bygdene, skular med FAU sine høyringsuttalar i det som hittil er blitt resultatet. Det er dei som kjenner sin barnehage/skule best. Det er ein sterk og useriøs påstand å hevda at dei vil underslå kunnskap/kjennskap om negative tilhøve ved desse for å behalde dei.

Dei fleste av oss vil handle med mål om borna sitt og bygda sitt beste!

Sølvi Ulvenes

Samfunnsengasjert innbyggjar og bestemor til mange skuleborn