– Vi sat ute og drakk kaffi. Plutseleg høyrde vi ein smell.

Ekteparet Nævdal fekk med seg alt som skjedde under brannen i Uskedalen søndag føremiddag.

Grenda møter Bente og Helge Nævdal når brannen er under kontroll, og politiet og brannvernet er i ferd med å førebu opning av eine feltet i bilvegen forbi staden. Paret bur på oppsida av hovudvegen, direkte ovanfor husværet som tok fyr. Helge fortel korleis dei opplevde dramatikken.

– Vi sat ute og drakk kaffi, og ante fred og ingen fare. Plutseleg høyrde vi ein smell, og kikka ned for å sjå kva det var. Då såg vi at det byrja å ryka frå altanen til det sørlegaste husværet. Like etter såg vi bebuaren koma ut og ropa. Fyrst var vi redde for at det var kona han ropte på, og at ho ikkje hadde kome seg ut, men vi fekk etterpå høyra at ho heldigvis ikkje var heime. Det viste seg at det var hunden han ropte på. Straks etter sprang han vidare til dei andre husværa og ropte til naboane om at dei måtte koma seg ut.

Gassen

Helge kan leggja til at også hunden kom seg i sikkerheit. Han har også høyrt ei mogleg årsak til brannen.

– Han (bebuaren) sa at det var gassen som eksploderte. Han måtte berre koma seg ut, og hadde inga moglegheit til å sløkka. På eit par minutt var heile huset i full fyr, seier Helge Nævdal.

– Det gjekk grådig fort. Det var nesten sjokkarta, legg Bente Nævdal til.

Ekteparet meiner at huset stod i full fyr klokka 10.22. Dei trur det tok 12-15 minutt før brannvesenet kom.