Den sikta hevdar dødsfallet skuldast ei ulukke

Laurdag føremiddag vart det halde fengslingsmøte i Bergen etter at ei kvinne vart funne død på Varaldsøy i 20-tida torsdag kveld.

Ifølgje Bergens Tidende vert den sikta karakterisert som venn av den døde kvinna. Begge budde no på Varaldsøy, men ingen av dei er derifrå opphavleg.

I fengslingsmøtet nekta mannen straffeskuld.

– Han erkjenner ikkje at det har skjedd noko form for basketak. Skadane er truleg eit resultat av eit fall. Etter at han har sett dette, så har han utført munn-til-munn-metoden og hjartekompresjon, seier forsvarer Jørgen Riple til BT.

Advokaten fortel vidare at klienten har forklart at han fekk panikk då han merka at kvinna ikkje var medviten. Etter det slit han med å hugsa detaljar.

Dyrka hasj

VG skriv at både den sikta og den døde, som begge er i 40-åra, er kjende av politiet frå før. Mannen skal vera straffedømt både i Norge og i utlandet, mellom anna for å ha dyrka hasj.

Politiadvokat Eli Valheim la fram påstand om fire vekers fengsling med brev- og besøksforbod. Kva resultatet vart, er førebels ikkje kjent.

Avdøde etterlet seg ein vaksen son. Han har Bjarte Aarlie som bistandsadvokat.