Bokhandlaren: – Lokalbøkene er svært viktige for oss

Laurdag signerte forfattarane Sigurd Vikøren og Morten Nygård sine nyaste bøker hos Rosendal Bokhandel. Bente Soldal er sjeleglad for dei lokale bøkene som kjem ut.

– Det er desse tre som er komne til no, og det er bra det så tidleg på året. Alle tre har selt bra hos meg. I tillegg veit me at det kjem bøker om krigen og frå sogelaget. For meg som liten, lokal bokhandel er dei lokale bøkene omtrent alfa og omega, slår Bente Soldal fast.

Sjølv om bokhandlaren er sjukemeldt for tida, har ho likevel pulsen på kva som rører seg i bokbransjen.

– Dei lokale bøkene er ein monaleg del av bøkene me sel, og som oftast toppar dei lokale bøkene salslistene våre ved årsslutt. Så folk må berre halda fram og skriva. Samtidig er «lokal» eit vidt omgrep for oss. Til dømes ser me på Jan Rabben som lokal, og han skal etter planen koma med ei bok om fuglar i løpet av året, som er noko me ser fram til, seier Bente Soldal med eit smil.

Oppfølgjar

Då Morten Nygård og Sigurd Vikøren laurdag sette seg saman utanfor bokhandelen til Bente Soldal, var kanskje ikkje forventningane dei største. Vikøren lanserte til alt overmål to bøker for ein månad sidan, medan Nygård fullførte trilogien om kyrkjegardane i Kvinnherad om lag samstundes. Etter tre timar i sola var karane godt nøgde med responsen.

– Overraska og veldig nøgd. Det har vore bra folk heile tida, og dei har vore nysgjerrige på kva me har hatt for oss. Så for min del har det vore svært vellukka, meinte Morten Nygård, som på direkte spørsmål måtte vedgå at det «utruleg nok» var ein del som ville ha signaturane deira også.

– Det verkar som at me har litt synergieffekt av å vera to, la han til.

– Dette er starten på ein symbiose, gliste Vikøren for han noko meir alvorleg la til:

– Eg hadde ikkje nokon forventningar, for eg visste ikkje kva eg kunne venta meg, så viss Morten er nøgd, så er eg nøgd, sa Vikøren.

Han som er ute med to bøker, hadde denne dagen opplevd mest sal av boka om hans engasjement for Hattebergvassdraget. Vikøren er heller ikkje framand for å begå fleire bøker.

– Det er ikkje noko hemmelegheit at «Blod er tjukkare enn vatn» er skriven slik at ho er den første av tre bøker. Om det blir meir, står igjen å sjå, smilte dobbeldebutanten.