Helse Fonna aukar aktiviteten att

Helse Fonna endrar beredskapsnivå frå gult til grønt. Dette gjer helseføretaket i stand til å auka aktiviteten att.

Den siste månaden har Helse Fonna hatt lågare aktivitet enn vanleg, grunna mange pasientar med Covid-19. På det meste har det vore 12 pasientar med Covid-19 inne innlagde på sjukehusa.

Det førte blant anna til at det 17. mars vart innført gult beredskap i føretaket. Men no er situasjonen ein heilt anna enn han var førre månad.

– Smittesituasjonen i vårt distrikt er under kontroll, takka vera god innsats frå innbyggjarar og kommunar. Talet på pasientar har stabilisert seg på eit lågare nivå, og det er difor på tide å justera ned beredskapsnivået til grønt, seier administrerande direktør Olav Klausen i Helse Fonna i ei pressemelding.

Klausen er likevel klar på at pandemien ikkje er over.

– Vi ser at smittetala aukar både sør for Boknafjorden, og i Bergen. Difor må vera førebudde på at talet på smitta kan auka att også i våre region, seier Klausen.