Undarheim med utvida skuletilbod

På Undarheim skule har dei utvida skuletilbod for fleire elevgrupper i år, og det nyttar mange seg av.

Rett etter skuletid kan 1.-4. trinn gå i skulekor ein time kvar tysdag. Om lag 50 elevar deltek på dette gratistilbodet.

– Dette er eit samarbeidsprosjekt med kulturskulen, og fagpersonell kjem derifrå, fortel rektor Marie Elisabeth Kaldestad.

Skulekoret syng for full hals på julesongane dei skal framføra på juletrefesten seinare mot jul, akkompagnert av tromsøværingen Ingvald Tingvoll Nilsen-Nygård på gitar.

– Kan solistane koma opp? spør gitaristen.

Fire spente jenter tek plass ved sida av Ingvald. Gunhild, Linnea, Anna og Angelina.

– Amalie er òg solist, men ho er ikkje her i dag, opplyser Gunhild.

Jentene syng versa på «Vi tenner våre lykter» medan resten av koret stemmer i på refrenga så det ljomar i veggane.

 

Naturfag for dei eldste

I fjor byrja dei med utvida skuletilbod i naturfag for 7. trinn. Prosjektet drivast av den pensjonerte læraren frå KVV, Knut Jan Kaldestad.

– Her utforskar me mellom anna naturen og oppgåver som omhandlar miljø, utifrå praktisk retta oppgåver. Frå elevar som deltok på dette prosjektet i fjor fekk vi svært gode tilbakemeldingar. Difor fortset vi med tilbodet, fortel rektor ved Undarheim.

Kvar måndag har Knut Jan to skuletimar undervisning i naturfag etter skuletid.

– Her er det heile 31 elevar som er her heilt frivillig, smiler Knut Jan.

Då Grenda er innom er elevane i full gong med å henta utstyr dei treng til oppgåva læraren har gitt dei. Elevane får utdelt mikroskop, pinsettar, nåler, fargestoff, laukbåtar og skalpellar. Engasjementet er stort.

– Bruk nåla til å halda fast preparatet på objektglaset, drypp vatn på borte ved vasken etter at fargestoffet har virka i to minuttar, for å få vekk overflødig fargestoff. Legg dekkglas over, så er det klart for mikroskopet, forklarar pensjonisten dei ivrige elevane.

– Vi skal sjå på cellene i lauken, opplyser Erlend Blokhus til bladfyken.

 

Vil utjamna forskjellar

I tillegg til kor og naturfag innfører skulen òg leksetid for framandspråklege elevar etter skuletid, med pedagog. Dette kjem utanom det ordinære leksetilbodet ved skulen.

– Me ønsker å gje elevane våre eit fritidstilbod som kan vera med på å utjamna forskjellar. Det å arbeida med musikk og naturen er noko kvar elev har føresetnad for å gjera. Me har tru på at opplevingar med musikk og natur er noko som er med på å skapa danning og motivasjon, fortel Kaldestad.

Undarheim ønsker at elevane skal få høve til å læra mest mogleg uansett bakgrunn.

– Dette meiner me at me legg til rette for med skulekoret og naturfagprosjektet. I tillegg veit me òg kor viktig det er med inkludering og integrering for å lukkast i samfunnet, noko me meiner me arbeider for i stor grad både med kor, naturfag og ikkje minst leksetilbodet for framandspråklege elevar. Undarheim skule har 19 nasjonar representerte, sluttar rektoren.