Bed om hjelp til skuleveg

Røyrvik Grendalag har sendt brev til ordføraren med bøn om å hjelpa til å få trygg skuleveg for ungdomsskuleelevane frå deira område.

 

I e-post til ordførar Hans Inge Myrvold tar Grendalaget i Røyrvik opp tråden frå februar-mars, der dei sette sterkt fokus på skulevegen frå Røyrvik, gjennom Grønstøl og opp til hovudvegen på Kaldestad. Blant anna var dåverande fungerande ordførar Hilde Enstad med og gjekk traseen 5. mars.

I forkant av skulestart over helga, spør grendelaget no om kommunen har skikka på saka og vurdert tiltak, og inviterer ordføraren til å koma og gå turen med dei.

 

Mørkt, glatt og vått

– Det er ei problemstilling for skuleelevane som skal ta ungdomskulebuss frå Røyrvik til Husnes. Stoppunktet for bussen er per dags dato sett til Grønstøl. Stien opp til Grønstøl er om lag 1 km lang, og det eksisterer ikkje gatelys på denne vegstrekninga. Halvparten av vegen er ein sti som er konstant våt, og svært glatt om vinteren. Det er svært ulent terreng i delar av stien, og det har vore rotvelt av tre over vegen, gjer grendelaget greie for.

Dei legg vidare til at det er vanskeleg å gå der sjølv for vaksne personar, og at det med sykkel, barnevogn og liknande er nærmast umogleg å ta seg fram.

– I Røyrvik bur det per dags dato 20 barn som på sikt skal ferdast langs denne vegen. Per i dag er det allereie eitt av disse barna som er byrja å gå denne vegen, og til hausten kjem det eitt til. Deretter vil det verta nye barn kvart år ei god stund framover som skal ferdast langs denne vegen dagleg i skulevekene, forklarer grendelaget.

 

Inviterer ordføraren

Dei skriva at foreldra og barna sjølve vegrar seg for å bruka denne vegen, grunna manglande tryggleik. Resultatet er at foreldra vel å køyra barna sine til og frå skule, og legg om sin jobbkvardag grunna dette.

– Dette er i kontrast til Undarheim barneskule og Husnes ungdomsskule sine ønske om å redusera talet elever som blir køyrt til skulen grunna trafikktryggleik. Det er ei læring i det og begynne å ta buss i lag med medelevar. Dette bekymrar foreldra seg over, då det og kan gå utover den sosiale biten, grunngjev grendelaget.

Elevar i grunnskulen ved Sunde skule som bur i Røyrvika får transport med skulebuss med stoppestad nedanfor denne stien. Dei har då ein gangveg på omtrent 0,5 km til haldeplass, noko grendelaget meiner er akseptabelt, og er eit av fleire alternativ som dei har sett på.

Grendelaget avsluttar brevet med å invitera ordføraren til Røyrvika for å gå turen opp til Grønstøl i lag med dei.

– Me tenkjer det kan vera nyttig at du får sjå korleis skulevegen for barna her nede er. Me håpar at me kan drøfta i lag med deg, og kanskje koma fram til ei betre eller annleis løysing på denne skulevegen, då me ønskjer å ha ein trygg skuleveg for barna våre, sluttar Røyrvik Grendalag.