Har opna Ungdomshuset for pårørande: - Held ope så lenge det er behov for det
Vel 30 menneske er no samla i Ungdomshuset på Varaldsøy med kommunen si støttegruppe.
Klokka 10 opna kommunen si psykososiale støttegruppe Ungdomshuset på Varaldsøy opp for familie, vener og andre.
Ein stad mellom 25 og 30 menneske har møtt opp på besøkssenteret, og vil her få informasjon om den tragiske hendinga som har råka innbyggjarane på Varaldsøy hardt.
Artikkelen held fram under annonsen.
– Det er vanskeleg å ta innover seg. Eit sjokk. Det er heilt ubegripeleg, seier to personar Grenda har snakka med. Desse ynskjer å vera anonyme.
På Ungdomshuset får dei som ynskjer det moglegheita til å prata, eller få svar på spørsmål dei ynskjer å få avklart.
– No er det viktig å få lufta ut. Ungdomshuset vert ope så lenge det er behov for det, seier ordførar Hans Inge Myrvold.
Det er mykje presse på Varaldsøy, men besøkssenteret er stengt for pressa.
– Det var ein god orienteringsrunde der vi frå kommunen sitt kriseteam orienterte om kvifor vi har opna opp Ungdomshuset i dag. Leif Kongestøl orienterte om korleis kriseteamet jobbar, og vi fekk besøk av innsatsleiar Sondre Solheim som kort orienterte om denne tragiske hendinga, seier Myrvold.