– Ei djupt tragisk hending

Frå klokka 10.00 fredag føremiddag vert Ungdomshuset møteplass for innbyggjarane på Varaldsøy. Der vert også ordførar Hans Inge Myrvold til stades.

Etter å ha vore på Varaldsøy i heile natt, var ordførar Hans Inge Myrvold ein snartur heime då Grenda snakka med han i 08-tida fredag morgon. Han er snart på veg attende, og kjem til Varaldsøy klokka 9.45 igjen. Deretter vil kommunen opna Ungdomshuset som ein møtestad på øya.

– Dette skal vera ein plass for alle som ynskjer å prata, eller som har spørsmål dei ynskjer å få avklart. No er det viktig å få «lufta ut». Ungdomshuset vert ope utover dagen, så lenge det er behov for det. Og så får vi vurdera etterkvart om vi skal ha ope i helga også, fortel Myrvold.

Han gjer elles merksam på at Kjæreviksvegen vert stengt for trafikk i heile dag, noko han også skreiv i ei tekstmelding han sendte til alle innbyggjarane på Varaldsøy fredag morgon.

Gjer inntrykk

Hans Inge Myrvold legg ikkje skjul på at det er ein spesiell situasjon.

– Ja, det er det. Slik det er skildra av politiet, er det klart at det er ei djupt tragisk hending. Vi er heldigvis ikkje vane med slike hendingar i Kvinnherad, så dette gjer inntrykk på alle, meg inkludert. Derfor er det viktig at vi kan prata saman, seier Myrvold, som legg til at ein sjølvsagt skal ta smittevernomsyn under samlinga på Ungdomshuset.