Første «spadetak» for Seniorsenteret: – Dette har vi venta på i tre år

Roald Teigen i seniorgruppa fekk æra av å markera byggjestart for det nye Seniorsenteret ved å setja grabben i jorda på tomta i Husnes sentrum.

– Dette er kjempestort! Det er noko vi har venta på i tre år, sa Roald Teigen etter å ha klatra ut av gravemaskinen til Dimmelsvik Entreprenør.

Merkedag

Då hadde han nettopp teke det fyrste «spadetaket» på seniorsentertomta, og med det markert at arbeidet endeleg er i gang.

– Det manglar fire dagar på at det akkurat er tre år sidan vi hadde fyrste møtet, sa Roald.

Han har saman med seniorgruppa til Kvinnherad frivilligsentral jobba iherdig i tre år for å få realisert seniorsenter-planane. Torsdag vart det markert med flagg, kake og stromande jubel.

– Dette er ein merkedag i Kvinnherad-historia. Dette er det første seniorsenteret som blir bygd i kommunen. Då er det også viktig å markera det skikkeleg, sa Kristian Hus til dei mange frammøtte.

Otto er fyrstemann inn

Ein av dei som som hadde teke med seg flagget var Otto Blokhus. I tillegg til å ha jobba med prosjektet frå dag éin, var Otto også den første som sikra seg ein leilegheit i den komande storstova.

– Med det vert eg også den første som flyttar inn. Så om halvanna år kan ein koma og besøkja meg i leilegheit 501. Frå der kan eg sjå fjell, vatn og sentrum. Ja, eg får kontroll på alt, ler han og legg til:

– Det gler eg meg storvegs til.

Gler seg gjer også Kvinnherad Breiband. Dei får rett nok ikkje like god utsikt som Otto, men dei får til gjengjeld eit skreddarsydd lokale som skal gjera kvardagen enklare for breibandsleverandørane.

– Dette er ein stor dag for oss. Vi gler oss veldig til å få eit lokale kor vi får samla infrastruktur og som er skreddarsydd for oss. I tillegg er det kjekt å sjå at det er så mange som har møtt opp for å få med seg dette, det er tydeleg at det er mange som gler seg, seier dagleg leiar Gunnhild Nilsen Hillestad i Kvinnherad Breiband.

Smittande engasjement

Ansvaret for å reisa bygget er det Engelsen Bygg som har.

– Det er byggjestart på måndag. Dimmelsvik Entreprenør byrjar då med masseutskifting, før ein skal pela på tomta. Etter det går dei i gang med betongarbeidet, og vi håpar at grovbygget skal byrja å reisa seg i byrjinga av juni, seier dagleg leiar Roald Urnes og legg til:

– Dette er ein stor dag for mange. Men det vert også kjekt å sjå all den aktiviteten som skal skje på tomta fram mot sommarferien.

Det store engasjementet under torsdagens kakefest smitta over på dei frammøtte. Det merka prosjektleiar Kjetil Rangsæther i Dimmelsvik Entreprenør.

– Det er ikkje kvar dag vi er med på ein slik oppstart. Det er veldig kjekt å sjå eit slikt engasjement, seier han.