Slik er den nye kvardagen til heltane våre

Dei er kommunen si frontlinje i kampen mot koronaviruset, og jobbar knallhardt kvar einaste dag for at våre mest sårbare skal ha det trygt og godt. I desse dagar har helse- og omsorgsarbeidarane det ekstra hektisk.

– Dei er utruleg positive og løysingsorienterte. Vi veit at vi kjem til å måtta trappa opp kampen mot viruset, men denne staben vi har gjer ein fantastisk jobb, seier kommunedirektør Ragnhild Bjerkvik om dei tilsette i helse- og omsorgssektoren i Kvinnherad.

 

Oppgåvene blir ivareteke

For trass hektiske dagar og ein kvardag som verkeleg er snudd på hovudet, er det ingen som sutrar og klagar. Dei gjer det dei kan for å sørga for at eg og du er trygge om vi skulle bli sjuke og ha behov for hjelp.

Blant dei som legg ned ein formidabel innsats er dei tilsette på Halsnøytunet.

– Kvardagen er meir hektisk enn tidlegare, det er han. Det er mange ting som skal koma på plass, og vi har personale som er ute av drift. Men vi har eit personale som er godt førebudd, veldig flinke og som står på slik at alle oppgåver våre blir ivareteke, seier einingsleiar Tove Omdal ved Halsnøytunet.

 

Godt førebudde

Dei har i dag ein stad mellom åtte og ti tilsette som er heime som følgje av karantene eller symptom. Noko som betyr at dei kvar einaste dag har fråvær.

– Vi har omdisponert ein person som no berre sit og jobbar med å kartleggja vikarbehovet vårt og som sørger for at vi har koordinert personale her på huset. Det hjelper veldig, seier Omdal.

På Halsnøytunet var dei tilsette tidleg ute for å friska opp kunnskapen sin rundt smittevern. Med det har dei heile vegen vore godt førebudde på det som har venta.

– Vi står i frontlinja i denne situasjonen og skal vera klare til å stå i det som kjem. Vi var tidleg ute og informerte personalet om  at dei burde gå gjennom ei oppdatering på smittevern. Det er jo noko vi har i utdanninga vår, men det er ikkje problemstillingar vi møter på så ofte. Så vi har friska opp i kunnskapane våre med kurs og prosedyrar, seier Omdal.

– Så eg føler heilt klart at vi godt førebudde. Dei tilsette her er flinke, står på, tek vakter og hjelper til der dei kan.

 

Positivitet og velvilje

Som dei andre aldersheimane i kommunen, har også Halsnøytunet besøksforbod. Det er eit av mange tiltak som er sett i verk for å hindra eit koronautbrot på aldersheimen.

– Vi har eit stort fokus på å halda viruset vekke. Samstundes rustar vi oss og jobbar utifrå at det kan bli eit stort utbrot. Det er det vi planlegg for og har rutinar på at skal skje, vi er oppdaterte på kurs, har medisinar og utstyr, og følgjer retningslinjene frå både beredskapsleiinga i kommunen og myndigheitene. I tillegg har vi eit reinskapspersonale som gjer ein veldig god jobb, seier Omdal.

Denne situasjonen kom veldig fort på Kvinnherad og Norge elles. Det har ført til ei stor arbeidsmengd på dei tilsette i helse- og omsorgssektoren. Likevel fortel Omdal at positivitet rår på arbeidsplassen.

– Det gjekk veldig fort. Og det er klart at det har vore ei store arbeidsmengd med å få dekka inn vikarar, ha det rette utstyret og disponera planar og rutinar på korleis vi skal handtera eventuell smitte hos personell eller pasientar. Men det er positivitet og velvilje over heile linja, og alle er villige til å stilla opp, seier ho.

 

Munnbind

Det var også næringslivet då Tove tok ringerunden rundt på Halsnøy for å høyra om nokon hadde munnbind til overs.

– Vi klare oss godt med utstyr, men vi ser at det kan bli krevjande å få tak i nok munnbind. Eg har fått napp hos nokon verksemder på Halsnøy, men om det er nokon som har munnbind dei kan dela med oss, så er det berre til å ta kontakt, seier Tove.

Ho skryt også over informasjonsflyten frå beredskapsgruppa i kommunen.

– Vi føler at vi er godt ivareteke. Dei gjer ein god jobb, sluttar ho.