Innspel til lokalaviser og lokalpolitikarar om skule- og barnehagestruktur

Det uroar oss i FAU Sunde barnehage og FAU Sunde skule at prosjektgruppa, administrasjon og kommunedirektør (KD) har i si innstilling i oppvekstkår-planarbeidet, i stor grad summert saman dei argumenta som støttar det synet KD og administrasjon hadde før debatten tok til - songen dei har sunge i snart to tiår - medan argument for å behalda skular og barnehagar som no i særs liten grad vert løfta fram.

Har prosjektgruppa gløymt sine eigne ord i arbeidet med oppsummeringa, at “(...) Ytringar der ein manglar informasjon eller der ein meiner det er feilinformasjon medfører endringar i planen og vart merka gult, (...)”? For oppsummeringa er omtrent like grønt som graset på andre sida. Graset vert som kjent grønt der ein pleier det. Til dømes har ikkje KD og administrasjonen teke med korleis spesifikt små og mellomstore barnehagar vert skåra av føresette i foreldreundersøkinga til Utdanningsdirektoratet. Dei har ikkje inkludert korleis nye byggjefelt kan påverka barnetal og elevtal i ein skulekrins, sjølv om det er fleire høyringssvar som påpeiker nettopp dette. FAU Sunde barnehage sitt høyringssvar seier noko om to nye bustadfelt i skulekrinsen, men KD (og prosjektgruppa?) ser ikkje dette som “(...) oppklarande og viktige innspel i høyringa.”, og det vert vel å rekna som eit av dei “aller fleste innspel (...) er subjektive meiningar. (...)”. Er det forfattarane av høyringssvara, eller er det KD og administrasjon, sine meiningar ein eigentleg refererer til her? Me var til dømes av inntrykk at gode relasjonar, som FAU Sunde skule har teke opp, er lovfesta av rammeplan og læreplan, barnehagelov og opplæringslov.

FAU Sunde barnehage har peika på konkrete feil i planen for strukturendring. Eitt av innspela til FAU var at planen har i særs liten grad teke utgangspunkt i kva som vil vere kvalitet. Me poengterte at planen tek i stor grad utgangspunkt i økonomi. FAU registrerer at KD uttalar at ein ikkje kjem heilt utanom å vurdere økonomi, korkje i privat eller offentleg sektor. Takk, det skjønar me òg. Det var ikkje poenget vårt med innspelet: Planen tek i stor grad utgangspunkt i økonomi. Planen skulle i stor grad ta utgangspunkt i kvalitet. Det gjer den ikkje. Eit anna innspel frå FAU Sunde barnehage var budsjettet som er sett opp i konsept 0. Her er det lova nybygg til den eine og den andre millionen, men lite og ingenting skal rivast og skular og barnehagar får ikkje noko meir areal. Kva for bygg er det kommunen skal byggja, som skal plomberast? Eller er det heving av tak som skal kosta i konsept 0?

Dette er heller ikkje eit av punkta KD og administrasjonen har oppsummert, sjølv om dette mogleg er ein grov feil i økonomivurderinga KD uttalar at me ikkje kjem utanom. Begge FAU har meldt inn utfordringar og feil med kalkuleringane som er gjort.

Eit vidare innspel er den manglande kompetansen i oppvekstsektoren som me hyppig kan lesa om i media. FAU Sunde barnehage la fram tal einingane og skuleeigar sjølve rapporterer inn, og tal henta frå fakta om barnehagar - likevel er dette ikkje teke med i oppsummeringa til prosjektgruppa og dermed i KD si innstilling.

FAU Sunde skule poengterte skulestorleik som eit bekymringsmoment når det kjem til læringskultur, mobbing og trivsel, lærartettleik og vidare. Prosjektgruppa/KD/administrasjon svarar at skulestorleik ikkje er avgjerande. Neivel, men er det ein faktor? Kven seier at det ikkje er avgjerande? Kva for korrelasjon finns? Å seie at det ikkje er avgjerande svarar ikkje på bekymringa i det heile. Og høyringssvara våre er langt i frå dei einaste svara som er oppsummert heller svakt. Diverre.

FAU Sunde barnehage og FAU Sunde skule vil oppmoda politikarane våre - i alle parti, de som gjekk til val på å behalda skulane og barnehagane og de som gjekk inn for å endra - på det sterkaste om å setja seg inn i høyringssvara og ikkje lita på at oppsummeringa tek føre seg alle argumenta som kjem fram. Høyringssvara er i grunn lite subjektive. Me vil òg oppmoda dykk om å ha kvalitet i førarsetet, sjølv om òg de veit at ting kostar.

Men med tanke på kor lite pengar som er brukt på sektoren dei siste åra, kan me ta oss råd til å pausa økonomiaspektet fram til me har sett på kva kvalitet i barnehagar og skular er, kan me vel?

FAU Sunde barnehage

FAU Sunde skule

PS: Me håpar dei folkevalde har litt meir tiltru til bygdefolket enn det Ølvestveit visar å ha i sin uttale. Me forstår meir enn han trur.