Hevdar seg i Norgestoppen
På IL Trio sitt seriestemne i friidrett førre onsdag vart det prestert fleire sterke resultat.
Artikkelen held fram under annonsen.
Blant dei som utmerka seg var Trio sin eigen Ådne Bertin Stuland Olsen, eit 16 år gamalt talent frå Omvikdalen. Resultata hans i kule, slegge og diskos plasserer han mellom dei ti beste utøvarane i landet i hans klasse, viser Norges Friidrettsforbund sin statistikk.
Same statistikk plasserer 13 år gamle Amund Hella Berge-Soldal frå Uskedal IL høgt oppe. Hans 600 meter på tida 1.44,3 betyr ein imponerande 16. plass i landet.
Fleire talent
15 år gamle Haakon Myklebust Skjelnes frå Rosendal Turnlag og hans 3000 meter med tida 10.02,00 hamnar på ein flott 17. plass.
– Tida til Haakon, i eit veldisponert gjennomkøyringsløp før 1500-meteren i Stordleikane, ville truleg vore langt ned på 9.50 talet om han ikkje hadde møtte ein lei motvind på eine langsida av sitt sju og eit halvt rundars løp, kommenterer Jostein Hatteberg, leiar i RT.
Han meiner at resultata uansett viser at Kvinnherad i det nemnde trekløveret har flotte friidrettsungdomar.
– Truleg finst det mange fleire talent som burde prøvd seg på friidrettsbanen, gjerne alt i neste seriestemne den 12. august i Husnes Idrettspark, legg Hatteberg til.
Artikkelen held fram under annonsen.
Ny pers i Stordleikane
Haakon Myklebust Skjelnes frå Rosendal Turnlag var laurdag i sving i Stordleikane. Han vart då nummer to på 1500 meteren i 15-årsklassen med tida 4.37,58.
Tida er ny pers, men Haakon var ikkje heilt nøgd då det gjekk for roleg i starten, slik at han vart liggjande for langt bak.
– I mål følte han at han hadde mykje meir å køyra med, og såleis burde vore med og slåst om sigeren. Men det kjem nye sjansar, og alt i Gneistspelen på Fana Stadion den 22. august står ein ny 1500 meter på løpsplanen, opplyser Jostein Hatteberg i RT.
Tida til Haakon på Stord er elles den 23. beste på 1500 meter i hans klasse på Norges Friidrettsforbund sin nasjonale årsstatistikk.
Ein annan kvinnhering som gjorde det skarpt på Stord var Uskedal IL sin Amund Hella Berge-Soldal. Han vart nummer tre på 600 meter med tida 1.42,53. Tida plasserer Amund på 18. plass i hans klasse i den nasjonale årsstatistikken. Også Amund skal springa i Gneistspelen.