Norconsult etablerer seg i Rosendal

Rådgjevarselskapet Norconsult har ambisjonar om å veksa i Kvinnherad. I førre veke opna dei avdelingskontor i Rosendal.

 

– Kvinnherad er ein spennande marknad, og me har mange oppdrag her i kommunen. Satsinga har starta med to sivilingeniørar, men me vonar å tilsetja fleire, seier Endre Lægreid.

Han er kontorleiar for regionen Hardanger-Voss, og tok tysdag i mot Grenda i kontorlokala i Vangstun, der Norconsult no har etablert seg med sivilingeniørane Stephanie Gjelseth og Sigurd Guddal.

 

Slepp pendling

Norconsult er Norges største tverrfaglege rådgjevarselskap, med 4400 ingeniørar, planleggjarar og arkitektar tilsett, og 61 kontor i Norge. Lokalt har dei blant anna rammeavtale med Kvinnherad kommune innanfor fleire fagområde.

– Me har ein strategi om å vera lokalt representerte, og det har ført til at Norgeskartet er jamt pepra med Norconsult-kontor, også på mange mindre stader i bymålestokk, forklarer Lægreid.

Dei kjøpte Hardanger Consult i Odda og Eidfjord i 2010, og i 2016 starta dei kontoret på Voss.

– Me har sett mot Rosendal og Kvinnherad det siste året. Det har modna seg litt, men det er rett timing no når Stephanie er tilbake etter mammaperm, seier kontorleiaren.

Gjelseth har fem og eit halvt år bak seg i firmaet, med pendling til kontoret i Odda.

– Etter at eg fekk barn har eg gått ned frå full til 80 prosent stilling, for å få det til å gå i hop. No når kontoret blir her, kan eg gå opp igjen til full stilling, og sleppa å pendla, seier Gjelseth, som bur på Naterstad.

Sigurd Guddal, også frå Omvikdalen, har vore tilsett i Norconsult i tre år, før han skifta til Palfinger for halvanna år sidan. No er han tilbake i rådgjevingsfirmaet.

– Eg slutta i Norconsult fordi eg var lei av å pendla, forklarer han.

– Hovudmomentet for oss er at Kvinnherad med alle sine bedrifter og innbyggjarar er ein spennande marknad. Når me no har fått Guddal tilbake, så er det rett tid for ei etablering her, seier Endre Lægreid

Skal veksa

Gjelseth og Guddal kjem neppe til å gå oppå einannan, sjølv om dei no jobbar ved same kontor.

– Eg og Sigurd jobbar sjeldan saman på same prosjekt, me jobbar opp mot andre team innan våre fagfelt, fortel ho.

– Me er inne i alt frå store tverrfaglege prosjekt til garasjen i byggjefeltet, seier Endre Lægreid for å illustrera spennet i oppgåvene dei tar på seg.

– Me ser at mange kundar set pris på at me er lokalt til stades og kjenner lokale forhold og personar…

– Og grunnforhold, skyt geoteknikar Gjelseth inn med eit glis.

– … kombinert med at me har tilgang på spisskompetanse på kva felt som helst, legg Lægreid til.

Kvinnherad treng absolutt at det finst arbeidsplassar som kan trekkja kompetanse tilbake kommunen. Norconsult blir den første av dei nasjonale, store tverrfaglege miljøa som etablerer seg her.

– Alle ynskjer jo at ungdommane reiser ut og utdannar seg og kjem tilbake og bidreg igjen. Guddal og Gjelseth er to ressursar til i folden, og dette er ei spennande forbetring av kvardagen deira, med kortare arbeidsveg. Me tenkjer definitivt større enn desse to. Utviding er alltid aktuelt for oss om me får tilgang på dei rette fagressursane. Me skal ha opp eit solid miljø kring Guddal og Gjelseth, og kjem til å gjera ein offensiv i haust for å rekruttera. Me er absolutt interesserte i å koma i kontakt med gode ressursar lokalt, eigentleg uavhengig av fag, for me har fagmiljø å knyta folk opp mot, sluttar kontorleiaren.

 

Brei lokal portefølje

På relativt kort tid har Norconsult vore involvert i mange prosjekt i Kvinnherad:

• Prosjektering oppstart av B-hallen til Hydro Husnes
• Friidrettsanlegget i Rosendal
• Bassenggarderobane i Rosendal
• Bergslagen på Sunde
• Toftebrekka, stabilitetsvurdering
• Husnes brannstasjon

Artikkelen held fram under annonsen.
• Symjehallen på Hatlestrand
• Lundsnessvingane
• Avløpsanlegg Valevågen
• Kommunedelplan Vatn og avløp for Kvinnherad kommune
• Kollektivknutepunkt Rosendal
• Ænes Inkubator
• Skålakaien
• Bru over Furebergfossen

Artikkelen held fram under annonsen.
• Flaumvurderingar på ei rad elver i Kvinnherad
• Reguleringsplan for grøn næringspark på Husnes