– Ein prekær situasjon

Sjåførane knytt til Kvinnherad taxi AS er på nippet til å gje opp. Kommunen kan dermed risikera å enda opp utan drosjesjåførar.

Tidleg i mai vart det kjent at drosjesjåføren i Rosendal slutta og leverte inn løyvet sitt. No kan det same skje med dei tre andre sjåførane i Kvinnherad taxi.

– Kvinnherad taxi er no kome i ein prekær situasjon når det gjeld køyreoppdrag, og heile næringa står i fare for å bli lagt ned, skriv Arne Bjørnevik i ein e-post til Kvinnherad kommune.

Han viser til at Helse Fonna siste veka i mai tildelte anbodet for pasientkøyring til BSG transporting ANS. Dette gjeld heile Kvinnherad, med unnatak av Nordsida, Varaldsøy og Halsnøy. BSG leverte ikkje inn anbod for Halsnøy-sona, så den vann Kvinnherad taxi. At sistnemnde berre fekk den eine kontrakten, gjer at selskapet sitt driftsgrunnlag er blitt for lite.

– Heile anbodsprosessen har vore ein farse. Hadde vi fått éi sone til, til dømes Husnes eller Rosendal, så kunne vi ha drive vidare. Men no er ikkje grunnlaget for drosjeverksemd i Kvinnherad lenger til stades, og vi vurderer å gje opp heile greia. Paradoksalt nok har Helse Fonna tildelt pasientkøyringa til eit selskap som ikkje har stor nok kapasitet til at alle som skal til behandling får den bilen dei har krav på, skriv Bjørnevik.

 

Må venta i lang tid

Til Grenda utdjupar han at konsekvensane av det nye anbodet avheng av kvar pasientane bur.

– Viss folk bur innanfor postnummera til Rosendal og Husnes, så køyrer ikkje BSG. Ein som bur i Røsslandslia vert såleis ikkje henta, medan ein som bur på Kaldestad blir det. Ein som bur i Rosendal vert heller ikkje henta, men det blir dei som bur i Dimmelsvik. Dei som bur i Rosendal og på Husnes må ringa til Kvinnherad Taxi, for desse turane tener ikkje BSG pengar på, og vil såleis ikkje ha, hevdar han.

Dei pasientane som må nytta Kvinnherad taxi må leggja ut sjølve, søkja om refusjon, og venta 6-8 veker før pengane kjem.

– Det er ikkje småpengar det er snakk om, spesielt ikkje for minstepensjonistar. Eg veit om folk som har slutta å gå til behandling fordi dei har ikkje råd til å betala for transporten, fortel Bjørnevik.

 

Bed om krisemøte

Kvinnherad taxi har snakka med ordføraren på telefonen om saka, men bed òg om eit snarleg krisemøte.

– Kommunen kan ikkje akseptera at det skal vera forskjell på tenestene utifrå kor folk bur. Det må vera likebehandling for alle som bur i Kvinnherad, seier Bjørnevik, som krev at det blir ordna opp i det han kallar «urettmessige forskjellar». Han legg til at det tidlegare var sjølvsagt at taxien hadde køyring for det offentlege, noko som igjen førde til at bilane var tilgjengelege for privatpersonar 24/7.

Viss ikkje noko skjer kan det altså bli slutt på drosjetilbodet i store delar av Kvinnherad.

– Vi kan ikkje leva av å køyra fulle folk midt på natta to dagar i veka. Vi må ha noko pasientkøyring i tillegg. No er vi heilt på grensa til å gje opp, og skal gå i tenkeboksen dei næraste vekene, seier Arne Bjørnevik.

– Vil du seia det er ein akutt fare for framtida til Kvinnherad Taxi?

– Ja, det er det.

 

Helse Fonna svarar

Dagleg leiar i BSG transporting ANS, Tore Steinsvik, ynskjer ikkje å føra nokon debatt med Kvinnherad taxi gjennom media, og meiner Helse Fonna bør uttala seg. Anne Hilde Bjøntegård, direktør i klinikk for medisinsk service og beredskap, var i går oppteken i møte, men sendte eit relativt generelt svar via e-post. Der står det:

«Offentleg anskaffing har som prinsipp at den som gir best pris og vilkår får tilbodet. Når det gjeld drosjetransport, blir det også innstilt eit selskap nummer to for å sikra kapasitet. Her har Kvinnherad Taxi sjølv takka nei til å ta turar på andreprioritet.

Alle pasientar som har rett på pasienttransport, får dekt dette. Men pasientar som skal reise korte turar innanfor eige postnummer må bestille og leggje ut for turen sjølve. Dei får då refusjon i ettertid i staden for å få førehandsdekt utgiftene. Det beste hadde sjølvsagt vore om alle fekk førehandsdekt turane, men dersom pasientane må bruke eit selskap som ikkje ønskjer å inngå avtale med Pasientreiser, har vi ikkje grunnlag for førehandsbetaling».