Sjøsetjing i Steinparken

Sjølv om den nye varmestova i Steinparken ikkje er heilt ferdig, er dei fyrste attraksjonane allereie på plass.

 

Førre måndag vart to flotte modellar frakta frå løa til Monsa-Knut’n og opp til Steinparken. Det eine førestiller naustet som arkeologane fann spor etter då dei undersøkte traseen til gang- og sykkelvegen ved Seim. Originalen vart bygd kring år 400-600 etter vår tidsrekning, og var heile 40 meter lang og 16 meter brei. Modellen vart laga av Knut E. Skåla, og stod opphavleg i utstillinga på Guddalshuset. Dei siste åra har naustet vore lagra på Bjørke.

Den andre modellen er heilt ny, og viser det vidgjetne Kvalsundskipet.

– Originalen var 18 meter lang og hadde ti årar på kvar side. Det var ikkje eit vikingskip, det er det viktig å få med, men eit jernalderskip. Kvalsundskipet passar tidsmessig med naustet på Seim, fortalde Monsa-Knut’n då modellen skulle sjøsetjast i bekken som renn gjennom Steinparken.

I tillegg til interesserte frå Steinparken og Rosendalstiftinga, var ein skokk elevar frå skuleskipet «Mathilde» heldige og tilfeldige vitne til storhendinga.

– Han ligg fint i vatnet, konstaterte Svein I. Opdal.

– Veldig bra sjøeigenskapar, supplerte Ivar Baste.

 

Innomhus

Byggmeisteren sjølv var svært smålåten.

– Det var friviljug at eg tok på meg arbeidet. Øystein (Skaala) sa han ville ta vare på naustet, og då sa eg det kunne høva med ein båt der. Eg har jobba med han sidan før jul, men har trega på det, for det vart ein putlesjau. Eg ser ikkje så godt og har blitt klumpen på nevane, så det var litt stress. Men båten ser no skapeleg ut, kommenterte han.

Etter at den korte seglturen var over, vart både båten og naustet bore inn i den nye varmestova. Det er eit byggverk som passar flott inn i miljøet kring Steinparken og Vangssago.

– Vi ynskjer å utvida sesongen, slik at folk kan koma her heile året. Varmehuset gjer at om det høljar og regnar, så kan gjestene gå innomhus. Sjølve huset er vi for det meste i hamn med. No jobbar vi med finansieringa av utstillingane og innhaldet. Vonleg er alt ferdig i løpet av året, fortalde Øystein Skaala, leiar i Rosendalstiftinga.

 

Våpen

Utstillingane vil by på fleire høgdepunkt. Eitt av dei er steinaldersamlinga, som vil bli flytta hit frå Malmanger prestegard. Den inneheld våpen og reiskapar som tilhøyrde dei fyrste menneska som budde her. Besøkande som kikkar opp i taket, kan gle seg over synet av den gamle kyrkjebåten frå Nordrepollen. Det er ein 6-ering som er over hundre år gamal.

– Far min fekk i si tid førespurnad om å berga båten, elles ville han bli øydelagt. No tenkte eg det kunne vera ein fin dekorasjon her, opplyste Øystein Skaala.