Vonar på vassavtale med Hydro
Kommunen skal sikra vassforsyninga i Husnesområdet, og ynskjer eit samarbeid og kostnadsdeling med Hydro Husnes.
Formannskapet vedtok samrøystes å etablera eit borhol inn i Svartavatnet ovanfor Husnes. Kostnadsestimatet er på 19,2 millionar kroner eks. moms. Kommunedirektøren får fullmakt til å inngå kontrakt med entreprenørfirmaet Norwegian Pipeline Drilling AS for gjennomføring av tiltaket.
Artikkelen held fram under annonsen.
I tillegg får kommunedirektøren fullmakt til å inngå avtale med Hydro Husnes og andre aktørar som vil ha nytte av tiltaket. «Dette for å oppnå delvis økonomisk inndekning, og/eller oppnå rett til auka uttak av drikkevatn», står det i saksutgreiinga.
– I utgangspunktet er dette ei veldig god sak. Men det er ikkje veldig god forhandlingsstrategi å setja i gang utan å ha blitt samd med Hydro, meinte Ove Lemicka.
Sektorleiar Sigbjørn Øye opplyste at kommunen har hatt fleire møte med Hydro både i år og tidlegare om eit samarbeid.
– Men dei vil ikkje ta stilling til saka før til hausten på grunn av koronaen og andre ting, fortalde han.
Hastar
Husnes vassverk forsyner om lag 7.000 innbyggjarar på Husnes, Sunde, Valen og store delar av Halsnøy. Forsyningskjelda er Hellandselva, og største vasskjelde i nedbørsfeltet er Svartavatnet. Hydro Husnes har felles vassinntak med kommunen, og bruker vatn frå Hellandselva i aluminiumsproduksjonen.
«Prosessen ved Hydro Husnes krev store mengder vatn, og dei har på bakgrunn av dette uttrykt behov for større vasstilførsel til produksjonen», står det i sakspapira.
Artikkelen held fram under annonsen.
Men det hastar for kommunen å setja i gang, for gjeldande konsesjon for regulering av Svartavatnet krev fysisk oppstart av tiltaket innan juni 2020, elles må det søkast om forlenga konsesjon.