Frå Minor Majority til Kari Bremnes

Også dei komande dagane står dei kulturelle høgdepunkta i kø på Baroniet.

 

På torsdag kjem visepopkunstnarane i Minor Majority til Baroniet og Riddersalen for fyrste gong. Det skjer i samband med at bandet i vår gav ut si fyrste plate på ti år.

– Med låtar som «Dancing in the Backyard», «Come Back to Me», «(In That) Premature Way», og ikkje minst «Supergirl», var Minor Majority med på å definera det fyrste musikalske tiåret i det nye millenniet her til lands. Eller som vokalist Pål Angelskår så kledeleg beskjedent sa det i intervju med «Norsk» på Spotify: «Vi er eit ganske stillferdig rockeband som var så heldige å treffa den musikalske tidsånda på byrjinga av 2000-tallet», står det i ei pressemelding.

Den nye plata «Napkin Poetry» inneheld musikk i country/americana stil og saktegåande, storslått rock i same landskap som Madrugada, Midnight Choir og Tindersticks på sitt mest melodiske.

 

Ytringsfridom

Fredag kveld er det duoen Ole Paus (song, gitar) og Ketil Bjørnstad (klaver) som inntek Riddersalen. På laurdag vert det to føredrag same stad. Forfattaren Elisabeth Aasen skal snakka om «Frå Antikkens Lucretia til Dagens Metoo», medan professor emeritus Gunnar Skirbekk tek for seg ytringsfridomen og det rettslege vernet for ytringsfridomen.

Tysdag og onsdag kjem Kari Bremnes attende til Riddersalen. Saman med bandet sitt skal ho altså halda to konsertar på Baroniet i år.

Vi nemner i same slengen at Ingrid Andsnes held konsert i Den røde sal torsdag 1. august. Dagen etter kjem Anita Skorgan til Riddersalen.