Kvitta seg med fjorårets rask

Representantar frå fire husstandar samla seg til dugnad i Kolavikjo på laurdag.

Kolavikjo er eit idyllisk område nedanfor fotballbanen i Neslia ved Rosendal. På laurdag steig røyken opp frå fleire bråtebrannar og eitt grillbål.

– Vi kutta det ned fjor, fortalde Marianne Bondhus Bøyum om haugane av greiner som stod i full fyr.

– Men i fjor var det restriksjonar på grunn av varmen, slik at vi kunne ikkje brenna då, la Helge Gunnar Flatland til.

Medan resten av gjengen tok ein pølsegrillingspause, prøvde Frank Matre og Kurt-Helge Breivik Dahl å setja fyr i endå ein haug med rask.

– Det er ein kamp å få fyr i dette, for det er veldig fuktig. Vi må difor vera klare og mata heile tida, sa Frank medan kollegaen heiv innpå fleire vedkubbar.