Klar med film om dramatisk skipsforlis

Filmen om forliset til «Mariane Danielsen» for 32 år sidan er no ferdig. Den inneheld også bilete frå Halsnøy, sidan havaristen vart kjøpt av Eide Contracting.

Den 2. juni i fjor hadde Grenda eit stort oppslag om lasteskipet «Mariane Danielsen», som forliste ved Grindavik, sørvest på Island, den 21. januar 1989. Grunnen til artikkelen i lokalavisa, var at vi vart kontakta av Gudlaugur «Gulli» R. Gudmundsson som jobba med å laga ein dokumentarfilm om båten. Dessutan vart havaristen kjøpt av Eide Contracting og pussa opp i Høylandsbygd, før skipet vart seld til Cuba.

No opplyser «Gulli» at den 33 minuttar lange dokumentaren «Björgun Mariane Danielsen» er ferdig. Filmen handlar både om forliset, berginga og kva som hendte med skipet seinare.