– Blant dei største i landet

Kvinnherad står for nesten 2% av landsproduksjonen av oppdrettsfisk. Det kan bety mykje pengar i kommunekassa i oktober 2018, kanskje opp mot 30 millionar kroner.

Førre torsdag skreiv Grenda om havbruksfondet som regjeringa no har ute på høyring. Om det vert vedteke kan norske oppdrettskommunar forventa enorme pengegåver utbetalt i oktober neste år. Då det er fleire usikre faktorar, er det førebels ikkje mogleg å seia kor store beløp det er snakk om, men avisa Hitra-Frøya reknar med om lag 73 millionar kroner til Frøya kommune, som står for 4,29% av alt norsk fiskeoppdrett. Hitra har 2,65%, og kan såleis mogleg gle seg til 45 millionar.

I førre artikkel hadde vi ikkje noko tal for kor mykje av fiskeoppdrettet som skjer i Kvinnherad. Men det kan Hans Inge Algrøy, regionsjef havbruk vest i Sjømat Norge, no hjelpa oss med.

– Kvinnherad er mellom dei største oppdrettskommunane i Hordaland og dermed òg i landet, fortel han.

20.000 tonn årleg

Algrøy viser til forskingsinstituttet Nofima AS sin «Ringvirkningsanalyse for havbruk i Rogaland og Hordaland» frå november 2015. Rapporten omhandlar havbruksaktivitet på kommunenivå. Der kan ein finna ut kor stor del av Norge sin matfiskproduksjon av laks som føregår i Kvinnherad.

– Med bakgrunn i desse tala har Kvinnherad 8% av produksjonen i Hordaland, og Hordaland har kring 20% av produksjonen i heile landet. Det betyr at det i Kvinnherad vert produsert cirka 20.000 tonn laks årleg, noko som er i underkant av 2% av landsproduksjonen, opplyser Hans Inge Algrøy.

Legg vi det til grunn og samanliknar med Frøya og Hitra, skulle Kvinnherad såleis ha håp om å få kring 27-30 millionar kroner frå havbruksfondet. Det er musikk i øyra for ordførar Peder Sjo Slettebø.

– Veldig gledeleg, kommenterer han.

Kraftfondet

Slettebø har tidlegare uttalt seg negativt om ei produksjons- eller arealavgift for oppdrettsnæringa. Havbruksfondet, som er knytt til veksten i bransjen, er han derimot positiv til.

– Eg var imot ei produksjonsavgift, for ein kan ikkje dobbelt og trippelt skattleggja ei næring. Prognosane for havbruksfondet viser at det er rett å oppretta eit slikt fond. Eg meiner den beste løysinga er å knyta ei avgift for oppdrettsnæringa saman med vekst. Kvinnherad kommune må leggja til rette for at næringa kan veksa i vårt distrikt, og syta for at vi har tilgjengeleg areal til ei kvar tid, seier ordføraren.

Pengane frå havbruksfondet kan koma godt med i ei kommunekasse som førebels er avhengig av eit anna fond.

– Midlane frå havbruksfondet kan enda i omtrent same storleik som konsesjonskrafta, det seier litt om perspektivet. Dette er dessutan inntekter vi treng. Viss vi kan få kompensert inntektsfallet vi har på andre område, så kan vi raskare fasa ut avkastninga frå kraftfondet, analyser Peder Sjo Slettebø.