Uvanleg tidleg pløyestart

Gardbrukar Joar Tveito er allereie godt i gang med å pløya den eine bakken sin, like ved Kvinnherad kyrkje. Målet er å bli heilt ferdig med arbeidet før dei 150 sauene hans startar lemminga.

– Eg byrja å pløya på måndag. Det er det tidlegaste eg har vore med på. Det er veldig, veldig tidleg, seier Joar Tveito, og ser utover den nypløgde bakken.

Når Grenda er på besøk har han berre ytterkanten av området att. Så vidt han har registrert, er det ikkje andre bønder i området som har kome i gang med pløyinga enno.

– Ikkje som eg har sett, korkje her eller i Omvikdalen. Det vanlegaste er å byrja i april, opplyser han.

I fyrste omgang er det 20 mål han skal leggja om. Sjølv om det har regna mykje i vinter, var tilhøva gode då Joar sette i gang med prosjektet.

– Det har vore svært vått i jorda, men det tørka fort då vinden og varmen kom. Dessutan er dette sandjord, slik at vatnet renn raskt ut av bakken, fortel han.

 

Gravplass

Når pløyinga er i mål, er neste fase å pitla stein. Men det ser Joar lyst på, for bakken har vore dyrka mange gonger før, så vonleg er det lite stein att. Deretter gjenstår kalking, møking, horving, og til slutt såing og tromling.

– Eg har tenkt å gjera alt arbeidet i dagane framover, men det er vel meldt regn i morgon, så då vert det truleg ein pause. Akkurat no hadde eg tid til å setja i gang, dessutan var vêret fint. Eg vil prøva å bli ferdig før lemminga byrjar, for då har eg 150 sauer som skal lemma. I tillegg har eg 100 geiter som skal mjølkast, smiler Joar.

Han må rett nok vera noko forsiktig når han driv på, for bakken vart brukt som gravplass i eldre tider, og er såleis freda. Difor har han berre lov til å gå 30 centimeter ned i jorda. Men det er nok til å sikra eit godt utbyte av arbeidet.

– Vi har alltid kjempegode avlingar på denne bakken. Det er herifrå vi hentar mesteparten av fôret vårt, seier Joar Tveito.

Meiningsfullt

33-åringen har fram til no jobba på anlegg rundt om i heile landet. Men etter fyrst å ha teke pappaperm, utvida han med vanleg permisjon for å jobba på garden på heiltid. Draumen er å fortsetja med det.

– Eg trivst best med gardsarbeid, for det er mest meiningsfullt for meg. Dessutan er eg litt gamaldags av meg. Eg likar best å jobba med det jordiske, og er ikkje så mykje inne på datamaskiner og slikt, fortel han.

Joar overtok garden Skåluro i Rosendal frå mora Edle Tveito for kring eitt år sidan. Det har han aldri angra på.

– Trivst du som bonde?

– Ja, det gjer eg. Men eg føretrekk å bli kalla gardbrukar, eg synest det passar best, understrekar han.

 

Geitene på Haukeli

Utanom dei 150 lemmeklare sauene, har garden også fem kyr av den gamle, ærverdige rasen Vestlandsk raudkolle. Men for folk flest er nok Skåluro mest kjent for geitene sine. Under kjeinga i februar kom det 150 nye geiter til verda, mange av dei vart gjevne bort.

Om somrane vert flokken sendt til Haukeli, der dei verkeleg kan nyta tilværet.

– Vi leverer mjølk til meieriet i Edland, men kokar òg noko opp til privatbruk. I tillegg har vi ein del ammegeiter som går kring Navarhaug og Skålafjell heile året, fortel Joar.

Koronapandemien har førebels ikkje påverka arbeidet hans som gardbrukar. I staden har situasjonen ført til at mange har understreka viktigheita av at landet i større grad er sjølvforsynt av matvarer. Det er eit synspunkt Joar Tveito støttar fullt ut.

– Ja, det synest eg er veldig viktig, seier han, før han set seg i traktoren for å fullføra dei siste pløyerundane. Frå førarsetet kan han også nyta ei utsikt som kan ta pusten frå kven som helst. Nedom garden tronar Kvinnherad kyrkje og fjorden, bakom reiser ein snødekt Melderskin seg, og i sør og aust blenkjer Malmangernuten, Omvikdalsfjella og Ulvanåso i sola.