No er arbeidet med ny brannstasjon i gang

For snart to veker sidan fyrte hovudentreprenør Engelsen Bygg i gang arbeidet med den nye hovudbrannstasjonen på Husnes.

– Det er veldig kjekt å endeleg vera i gang, seier prosjektleiar Stian Ersland frå Kvinnherad kommune.

 

Beredskapen vert ikkje råka

Det er vel to veker sidan Engelsen Bygg og deira underentreprenørar starta opp med grunnarbeidet på tomta til den nye hovudbrannstasjonen på Husnes. Brødrene Musland står for gravinga med omlegging av vatn og avløp, medan Husnes Røyr og Vestnorsk Brønnboring står for boring av energibrønnar.

– Det skal leggjast opp ein del VA-anlegg, i tillegg så har ein starta med graving og masseutskifting. Grunnarbeidet vil nok halda på fram mot jul, så reknar eg med at vi vil vera ferdige med det litt ute i januar, seier Ersland.

Etter det skal entreprenøren setja opp ein mellombels stasjon på tomta. Det må gjerast før ein kan gå i gang med rivinga av den gamle brannstasjonen.

– Arbeidet her skal ikkje gå utover den operative tenesta på noko som helst måte, seier Ersland før brannsjef Atle Josdal i Kvinnherad brann og redning skyt inn.

– Vi har fått på plass ei god mellombels løysing for beredskapen. Og den vil bli ivareteke gjennom heile byggefasen, seier Josdal.

 

Betre helse

Brannsjefen er glad for å sjå at det endeleg er full drift på området, og gler seg stort til at ein ny stasjon står klar.

– Det er utruleg gøy at vi no er i gang. Gleda handlar nok mest om korleis vi har hatt det. Vi heldt jo på å få taket i hovudet her, og då vi tok ned takkonstruksjonen på stasjonen så var veggar og tak fulle i mugg og måtte bytast ut. Så det å få på plass ein ny hovudstasjon for heile Kvinnherad brann og redning kjem til å bli veldig bra, seier han og legg til:

– Det vert ein betre arbeidskvardag i form av at vi då innfrir dei HMS-krava som er i dag. Særskild dette med kreftfare hos brannmannskap er noko skal vi ta på alvor, og med ny stasjon så kan vi gjera ein betre jobb med tanke på vår eigen helse.

Josdal og hans kollegaer kan sjå fram til å flytta inn i ein ny og betre brannstasjon på Husnes i løpet av seinsommaren 2021.

– Eg reknar med at vi er klare til å flytta inn før hausten kjem, og at vi med det har ein flett ny og innflyttingsklar hovudbrannstasjon i august, seier Ersland.

Stasjonen som då er reist vert noko lenger enn dagens stasjon og får eit ekstra tilbygg inn mot tomta i dag. Ein stasjon som Josdal er sikker på at kjem til å løfta kvardagen.

– Eg må få skryta over arbeidet som er gjort av eining for prosjekt og utbygging, vi som brukarar har fått lov til å ta del i prosjekteringsprosessen. Det gjer at vi vil få eit veldig brukarvenleg bygg som innfrir det som er av HMS-krav. Planløysingane vert funksjonelle og er lagt opp etter vårt arbeid, så dette kjem til å bli veldig bra, sluttar Josdal.