Endeleg oppstart for nytt bustadfelt i Ølve

Etter å ha vore på teiknebrettet sidan 1990-talet, er det no endeleg klart for oppstart av eit nytt bustadfelt med 16 einebustadar ved Dalsjøen i Ølve. Det er også planar for fleire tomter på Hatlestrand.

– Endeleg, får ein nesten seia. Dette har det vore jobba med lenge. Men etter at vi overtok feltet i fjor har det blitt fortgang i det, og vi satsar no på å koma i gang med veg, vatn og avløp allereie i slutten av mai, seier Ole Femsteinevik, dagleg leiar ved O. Jacobsen Trelast på Gjermundshamn.

 

Vil snu trenden

Alt av planar og formalitetar er allereie godkjent og på plass, så Femsteinevik og O. Jacobsen Trelast ventar no berre på grunnentreprenøren, før arbeidet med å klargjera dei fyrste åtte av i alt seksten tomter kan setjast i gong.

– Vi er klare, og ser verkeleg fram til at det no skal skje noko også i Ølve. I byggjesteg 1 vil vi konsentrera oss om dei åtte fyrste einebustadane, så tek vi resten etter kvart. Men slik vi ser det så bør det absolutt vera moglegheiter for å ha dei fyrste husa klare til neste år, seier Femsteinevik.

Han håpar og trur at prosjektet kan vera med og bidra til å snu den negative innbyggjartrenden som er i bygda no.

– Det er allereie positivitet i bygda med Palfinger sine kontraktar og arbeidet på Ølve Industrier. Så når det no også kjem på plass freshe tomter, så satsar vi på at alt ligg til rette for at det kjem gode og friske krefter til bygda. Noko som er på høg tid, for no har det vore roleg lenge, seier han.

 

Fleire planar

Også på Hatlestrand, nærare bestemt Stegane byggjefelt på andre sida av vegen i forhold til butikken, har Ole Femsteinevik og O. Jacobsen Trelast planar om å utvida.

– Det vil ikkje skje noko der med det fyrste. Det står enno litt planarbeid og slikt att, og vi er no oppe i arbeidet med eigedomsovertaking. Men det er her snakk om tolv tomter til einebustadar som vi skal stå klare til å byrja på så snart vi er ferdige i Ølve, seier Femsteinevik, som meiner det er positive tider i vente på nordsida.

– Det er flust av positiv giv i begge bygdene her, med planar om innandørs sandhall, nytt klubbhus og no nytt byggjefelt. Så det skjer noko heile vegen, og ingenting er jo betre enn det, sluttar han.