Skal levera luksusbåtar
Produksjonen av dei nye tenderbåtane er no i full gang i Ølve, og i alt skal Palfinger Marine levera 24 stykk til same skipsserie som livbåten MPC 49 vert levert til.
Båtane skal leverast til STX-verftet i Frankrike, som bygger dei tre cruiseskipa som MPC 49-livbåtane også skal leverast til. I alt skal det leverast 8 tenderbåtar per cruiseskip, som vert bygd for Celebrity Cruises – eit konsept med ein del nyvinningar retta mot luksusmarknaden i verda.
Dei nye båtane, som er ein kombinasjon av tenderbåt og livbåt, har fått namnet CTL57. Den har i samanlikning med livbåten MPC 49 mindre kapasitet, men er noko større i lengde. Dei nye båtane har katamaranskrog, vert 17,5 meter lange, og har ein kapasitet på 223 personar når den vert nytta som livbåt og 132 personar når den vert nytta som tenderbåt. Som følgje av at båtane skal fungere som tenderbåtar, og då skal nyttast til å frakte passasjerar til og frå land, innehar dei naturleg nok mykje meir komfort og luksus enn livbåtane.
Artikkelen held fram under annonsen.
Av dei flottaste
Produktdirektør i Palfinger Marine, Arild Lokøy, fortel litt om dei nye båtane som er under konstruksjon.
– Det kjem nok til å verta av dei flottaste båtane vi har levert, og dei vil inneha betrakteleg meir luksus enn det som er vanleg, fortel han.
Lokøy opplyser at båtane vil inneha utstyr som hurtigbåtsete, kraftig air-condition, samt at interiøret er forsegjort med konkrete fargar, møblar og ljossetting.
– Verftet og arkitektane til reiarlaget har jobba mykje med desse tinga som går på interiøret, samt at dei har gjort jobben med designet på overbygget. Vi står, saman med ein annan, for skroget som er av ein heilt ny type, fortel han.
Testa
Artikkelen held fram under annonsen.
Produktdirektøren fortel litt meir om det som kjem til å verta ein hurtiggåande båt.
– Det vil vera to store Yanmar-motorar om bord, på omkring 320 hestekrefter kvar, så det minner meir om ein hurtigbåt, supplerer Lokøy.
Båten vil verta testa opp mot krava den må innfri ein gong i løpet av sumarmånadane, men det er alt gjort ein del testar i mindre skala.
– Vi har gjort nokre testar i ein modelltank på Måløy, der dei er flinke på hurtiggåande båtar. Dei har ein omkring 180 meter lang tank, der vi fekk testa ein 2-2,5 meter lang modell av båten, fortel Lokøy sluttvis.