Full ordrebok og største kontrakt nokosinne

Ølve Industrier går travle tider i møte. Fredag signerte dei sin største kontrakt nokosinne, og ordreboka er full i overskodeleg framtid.

– Konsekvensane av dette er at me må byggja på kontordelen, få større kantine og tilsetja fleire, smiler ein nøgd dagleg leiar, Steinar Bjørkelund.

Fredag sette han namnetrekket sitt på ein kontrakt med Cermaq, som er i gang med å byggja eit heilt nytt lakseslakteri i Steigen i Nordland.

– Slakteriavdelinga skal vera oppe og gå i mai 2018, medan fileteringsavdelinga skal vera i sving frå første kvartal 2019, fortel Bjørkelund.

 

Fleire felt

Det er fleire felt Cermaq Norway har valt Ølve Industrier som leverandør på til slakteriet. Islager, transportskruar for is, isdoserarar og transport og distribusjon av isoporkassar og lok til pakkegrader og filet skal alle leverast av Ølve Industrier. I tillegg skal dei levera løysingar for å få kassane med ferdigpakket laks i over på pallar, noko dei gjer i samarbeid med RobotNorge og ABB. I sum blir det den største einskildkontrakten til bedrifta ved Hyttevågen i Ølve.

– Kontrakten er så fersk at me har ikkje byrja å produsera noko til han enno. Derimot har me hendene fulle med å produsera til to andre prosjekt. Me lagar eit heilautomatisk kassesystem til Marine Harvest sitt slakteri på Hjelmeland i Rogaland, og me leverer tilsvarande anlegg til Lerøy sitt nye slakteri på Jøssenøya i Nord-Trøndelag, forklarer Bjørkelund.

 

Utvidar

Då Grenda vitja bedrifta tysdag var det mellom anna Marine Harvest-prosjektet som det blei arbeidd med. Der skal Ølve Industrier levera det automatiserte anlegget i september.

– Delar av anlegget blir bygd ferdig og testa her i verkstaden, spesielt knutepunkt. Etterpå blir det finjustert når det blir montert i slakteriet. Når eit slakteri skal levera 10-15.000 kassar med fisk i døgeret, er du avhengig av at kassane kjem når dei skal, påpeikar Tor Heine Nerhus, som er med eigar i Ølve Industrier AS, saman med Thor og Arne Nerhus.

– Før var det gjerne to-tre tilsette på kasselageret. No når dette er automatisert klarer slakteria seg med ein, som truleg også kan gjera på litt anna i tillegg, påpeikar Bjørkelund.

Der slakteria no kan klara seg med færre tilsette kassehandteringa, må produsenten av systemet auka arbeidsstokken.

– Me har allereie tilsett ein ingeniør. Utpå hausten må me tilsetja ein ny industrimekanikar også. På toppen av det må me utvida kontordelen vår for å få plass til fire-fem nye kontorplassar og ny kantine. Så me er i vekst, sluttar den daglege leiaren.