Nytt håp for byggjefelt

Sjansen for å få realisert nytt byggjefelt og gang- og sykkelveg i Dimmelsvik er no aukande. Kommunen opnar nemleg for å gå inn med midlar.

I dei siste par avisene har Grenda kunna fortelja godt nytt om byggjefelta i Øvre Neslia i Rosendal og Dalsjøen i Ølve. No kan vi gleda lesarane med at det også er flotte tendensar i Dimmelsvik.

I mars 2014 vart det gjort kjent at Kvinnherad Bygg hadde planar om å setja opp ni tomannsbustader i Lundshagen, altså i området bakom Dimmelsvik Bil. Dagleg leiar Svein Bjarte Veastad vona å setja spaden i jorda allereie i august same år, men slik skulle det ikkje gå. Statens vegvesen kom nemleg med krav om at utbyggjar måtte laga gang- og sykkelveg frå bensinstasjonen og til brua i Dimmelsvik, noko som ville betydd ein stor ekstrakostnad.

Både Veastad og kommunen reagerte sterkt på kravet.

– Det kan ikkje vera vegvesenet si oppgåve driva sentraliseringspolitikk, meldte kommunalsjef Kjell Odd Nygård til Grenda.

 

Trafikksikring

Sidan har prosjektet for det meste lege brakk, men no er det igjen ting på gang. Like før jul vart det halde møte mellom Svein Bjarte Veastad, rådmann Odd Ivar Øvregård og sektorleiar Sigbjørn Øye. Då vart ein samde om at rådmannen skal leita etter ei løysing, slik at ein kan få forsert arbeidet med gang- og sykkelvegen.

– Då kan vi oppnå to ting; utbygging av byggjefeltet og trafikksikring. Rådmannen skal sjå om det er mogleg å få til ei forenkla løysing for gang- og sykkelvegen, eventuelt eit spleiselag for å få prosjektet realisert så snart som råd, seier Øvregård til Grenda.

Dette vil i så fall gleda alle innbyggjarane i området, som lenge har jobba for ein tryggare veg til skulen i Omvikdalen.

 

Fremjast politisk

Kommunen skal snart ha eit nytt møte med Statens vegvesen for å drøfta ulike vegprosjekt, og då vil også og gang- og sykkelveg i Omvikdalen verta sett opp på saklista.

– Dessutan har vi allereie byrja å jobba med prosjektet internt på rådhuset, men etter kvart må saka også fremjast politisk. Vi kjem ikkje utanom at kommunen må vera ein aktiv part om vi skal få dette til, noko som kan bety å bruka midlar på prosjektet. Men det er ikkje sett av pengar førebels, derfor må saka til politisk handsaming, fortel rådmannen.

– Er du optimistisk til å få gang- og sykkelvegen realisert no?

– Som i dei aller fleste slike saker, er det fyrst og fremst snakk om pengar. Eg er optimistisk når det gjeld å få dette til, men kanskje ikkje fullt så optimistisk til at vi skal greia å få det gjort sånn med ein gong, opplyser Odd Ivar Øvregård.