Landsskyttarstemnet avlyst

Sjølv om det ikkje skulle gått av stabelen før i august, er allereie årets Landsskyttarstemne avlyst. Dermed ryk sommarens høgdepunkt for mange kvinnheringar.

Landsskyttarstemnet 2020 var planlagt til dagane 7. til 14. august. Då koronapandemien braut ut, vart i fyrste omgang påmeldingsopninga utsett til 1. april. Men på måndag vart det bestemt at det ikkje blir noko stemne i år. Vedtaket vart gjort av Norges Skytterstyre, etter oppmoding frå arrangøren på Elverum. Årsaka er at koronapandemien «har blitt av ein veldig samfunnskritisk karakter», og det er ikkje lenger tilrådeleg å fortsetja med planlegginga.

«Landsskyttarstemnet krev store mannskapsmessige og økonomiske ressursar. No er dessverre risikoen veldig stor for at vi som arrangør, eksterne bidragsytarar/samarbeidspartnarar og alle dei profesjonelle arrangørane ikkje får moglegheit til å gjennomføra dei nødvendige førebuingane til stemnet. Vi som arrangør synest dette er ufatteleg trist, men det er viktig at vi forblir rasjonelle og tek gode avgjersler så tidleg som mogleg», vert det opplyst i ei pressemelding.

Arrangørane på Elverum bad samstundes om at dei i staden får vera vertskap for Landsskyttarstemnet neste år. Det kravde at dei neste arrangørane; Bodø, Voss og Steinkjer, utsette sine stemne med eitt år, noko alle aksepterte. Dermed gjer Elverum eit nytt forsøk frå 30. juli til 6. august 2021.

 

Trist

Kvart einaste år er det mange kvinnheringar som plar reisa på Landsskyttarstemnet. Blant dei ivrigaste har Hatlestrand og Ølve Skyttarlag vore. Men til sommaren må skyttarane derifrå finna noko anna å gjera.

– Det er jo trist at Landskyttarstemnet er avlyst, men sikkert fornuftig utifrå omstenda, seier leiar Elin Håvik.

Også mange andre skytestemne er kansellerte.

– I augneblinken er alle stemne i DFS-regi avlyste, og vi har valt å gjera det same i laget. Vi har såleis ingen aktivitet no, og slik vil det fortsetja heilt til vi får annan informasjon. Alle må bidra, og det er jo ein grunn til at det har blitt slik, seier Håvik.

– Vi får koma sterkare attende i 2021, det får vera målet, slår ho fast.