Mogleg flytting frå Haugesund til Bergen
Kvinnherad kommune er underlagt region Haugesund når det gjeld samarbeid mot akutt forureining. Men Are Traavik (Sp) meiner det er meir naturleg å sjå mot Bergen.
Kommunestyret gjekk samrøystes inn for innstillinga om å delegera mynde etter forureiningslova til IUA Haugesund (Interkommunalt utval mot akutt forureining). Men Are Traavik la fram eit tilleggsforslag om å greia ut ein overgang frå IUA Haugesund til IUA Bergen/Vest brann og redning.
Artikkelen held fram under annonsen.
– Kvinnherad brann og redning har eit veldig godt samarbeid med Vest brann og redning, som i dag har 17 medlemskommunar. Då ferja på Sydnes brann, fekk vi svært god hjelp frå Bergen, sa Traavik.
Beredskapsansvarleg Gunn Tove Petterteig opplyste at det er Miljødirektoratet som har plassert Kvinnherad hjå IUA Haugesund. Men sektorleiar Sigbjørn Øye skaut inn at det er kome signal om at Kvinnherad faktisk kan bli flytta til organet i Bergen. Traavik fortalde då at kommunestyret i Ullensvang hadde oppe tilsvarande sak samstundes, og der innstilte kommunedirektøren på å vurdera å søkja om overflytting til Bergen.
– Eg føler det er naturleg at Kvinnherad og Ullensvang er i lag om dette, meinte Traavik.
Forslaget hans vart oversendt til administrasjonen for nærare vurdering.