Sommaren kom seint

Jøye meg, juni var verkeleg ikkje mykje å skryta av. Låge temperaturar, få regnfrie dagar og nedbør heilt opp mot rekordane er den triste fasiten. Heldigvis slutta månaden i alle fall bra.

Statistikken for juni er litt amputert, sidan våre vêrmeldarar i Austrepollen, Valen og Ølve alle er på ferie. Men vi har meir enn nok tal til å slå fast at det var ein svært våt månad. Både Matre og Varaldsøy fekk meir enn 300 millimeter nedbør. Aller mest var det hjå fyrstnemnde, der rapporten viser 319,1 millimeter. Minst regn fekk Vang i Rosendal, utan at 207,9 mm vitnar om særleg til sommar.

Diverre har vi ikkje Hatlestrand med i vår oversikt, men ifølgje Nettavisen.no var det per 29. juni kome 296,3 millimeter, langt over bygdas tidlegare juni-bestenotering på 270,0 mm frå 1964. Avisa hevdar det til og med var nest mest i landet, berre bak Sand i Ryfylke. Men det spørst om dei ikkje har gløymt å ta med Matre i den utrekninga.

 

Regnfritt

Mange vil nok hugsa at det regna kvar dag i Bergen dei 26 fyrste dagane av juni. Det var mykje det same i Kvinnherad òg, men på det jamne enda vi på 5-6 døger utan regn. Unnataka er Varaldsøy som fekk så mykje som 10 regnfrie dagar, og i motsett ende finn vi Eik i Rosendal med berre 3. På Vang var det 5 nedbørsfrie døger, men det er lite imponerande når vi veit det var 19 året før!

– Det vart ein våt månad, men vi får vona på betre tider, oppsummerer Olav Karstein Hjelmeland i Omvikdalen.

Alt regnet inneber at avstanden mellom 2017 og 2016 aukar igjen, etter at den nesten var utlikna per mai. Men framleis skil Uskedalen seg kraftig ut. Der er 2017 enn så lenge tørrare enn fjoråret.

På Husnes er årets juni den nest våtaste som er målt sidan 1966. I denne perioden er 2011 verst med 280,1 mm, medan 1982 er tørrast med 7,9.

 

Mykje kaldare

Den varmaste temperaturen fann vi på Varaldsøy, med 27,4 grader den 30. Termometeret var på sitt lågaste den 1. juni, då Hydro Husnes noterte 3,7 grader. I Rosendal var det 6 døger over 20 grader, tilsvarande tal i 2016 var 13. Det viser sjølvsagt att på snittet for månaden. 13,3 grader i år, 15,4 i fjor.

Snitt-temperatur hittil i 2017 er no 7,02 grader i Uskedalen. Det må seiast å vera identisk med fjoråret, då det vart målt til 7,06.