Finn brisling i Hardangerfjorden

Sundag opna brislingfisket i Hardangerfjorden. Første natta fekk fiskebåten «Tunfisk» 35 tonn av dei små delikatessene.

Både den 38 meter lange båten og mannskapet tok seg ein nokre timars pust til kai i Rosendal på tysdag. Sundag fylte dei opp noko av lastekapasiteten sin med 35 tonn brisling, medan dei gjekk tomhendte gjennom natta etter.

– Måndag var det for mykje straum til at me fekk det til. Me fann bra med fisk, men straumen gjorde at me ikkje fekk ned nota. Brislingen stod i tillegg for djupt, fortel Rolf Sjo.

Han er ein av fire eigarar av Halsnøy-båten «Tunfisk». Ein av dei andre er Johnny Magne Sjo, som er skipper på båten. Med seg har dei fem andre Sjo-gutar, om enn noko yngre. Magne, Raimond, Ole Johnny, Tommy og Svein Kristian er mannskap.

 

Fulle kvotar

Båten var i Sognefjorden på jakt etter dei same delikatessene i førre veke.

– Me er ferdige med alle dei andre kvotane våre. Sild, NVG-sild, Nordsjøsild, torsk og makrell. Dette er eigentleg tida for makrell på desse traktene, men me var i nord og fiska kvoten vår i juni og juli. Såleis kan me vera her og leita etter brislingen, forklarer Rolf Sjo.

Før denne fiskesesongen vart minstemålet på brislingen auka frå ni til ti centimeter. Fisken blir vanlegvis ikkje større enn 13 til 15 cm.

– Det er greitt betalt for brislingen. Me får 7,50 kroner for kiloen om me leverer direkte til mottaket, opplyser han.

Med 35 tonn på plass ligg det fisk for kring 250.000 kroner på kjøling under dekk. Så vil dei neste nettene visa om det blir meir. Kjøleanlegget har ein kapasitet på i underkant av 400 tonn med konsumvare.

– Det ligg i blodet vårt dette med fiske. Elles hadde me ikkje drive med det framleis, ler Rolf Sjo.

Det er forresten ikkje rett å omtala det som berre éin båt som ligg til kai i Rosendal. Sjølv om det er «Tunfisk» som ruvar mest, så ligg både ein mindre sjark og ein lysbåt til kai òg. Konvoien jobbar i lag når dei jaktar etter brisling.

– Me sender sjarken i ein annan retning enn «Tunfisk», slik at me får undersøkt større område, seier Rolf Sjo.

 

Skummar fløyten

Magne, Raimond, Ole Johnny, Tommy og Svein Kristian Sjo er blant ungdommane som finn levebrødet på vatnet, enten det er i fjordane, i Nordsjøen eller nordpå.

– Dette er framtida til Kvinnherad, dette. Du veit, me kan ikkje slutta å eta når olja er forsvunnen. Og fisk er den rimelegaste måten å skaffa seg mat på, kommenterer dei medan dei er i ferd med å gjera seg klare for ein ny kveld og ei ny natt på fjorden, lysande etter brisling.

At dei andre kvotane er fiska opp, betyr at brislingjakta i fjordane på Vestlandet blir som ein bonus på toppen.

– No skummar me fløyten, seier Tommy.

– Og fyller opp lommeboka, gliser Svein Kristian.

– Me skal vera har lenge, så lenge oppdretta ikkje tar knekken på oss, sluttar Ole Johnny.

Og så lenge fjordane har brisling, så blir det litt fløyte å skumma for dei òg.