Vêret i mars var temmeleg surt

Sjølv om mars på ingen måte var heilsvart, er likevel inntrykket at det var ein ganske sur månad vêrmessigt.

Mars byrja veldig fint, men så kom det ein periode frå den 10. til 14. der det regna litt. Etter nokre fine dagar deretter, slo det til med nedbør kvar dag frå den 20. og ut månaden. Spesielt avslutninga var heftig. Frå kvelden 29. til morgonkvisten 31. ramla det ned uhorvelege mengder med vatn. I Mauranger vert det meldt om smått utrulege 131 millimeter tysdag 30.

Prisen for mest nedbør for månaden samla, går som vanleg til Matre. Der vart det notert 352,4 millimeter. Det er ikkje så langt unna landsvinnaren Gullfjellet utanfor Bergen, som slo til med 372,7 millimeter. Austrepollen vart nummer to, medan Omvikdalen fekk tredje plassen.

Heider for den tørraste bygda, går til Sæbøvik med sine 143,3. Også Rosendal-Vang, Hatlestrand og Valen stoppa under 200-grensa.

Kald og kvit

– April startar kald og kvit. Vonar den skiftar til varm og grøn, seier Olav Karstein Hjelmeland i Omvikdalen.

– Det er eit uttrykk som seier «april snø og mai kulde». Etter gamalt skal dette vera gunstig for bøndene, supplerer Henrik Barthel i Ølve.

Årets mars månad var ikkje så ulik fjoråret når det gjeld nedbørsmengda. Men det er ikkje mykje likskap når vi ser dei tre fyrste månadane under eitt. I 2020 var det kome om lag dobbelt så mykje nedbør som i år.

Historisk sett kan Hydro Husnes fortelja at mars 1967 er våtast med sine 487,5 millimeter. Tørrast var det i 2013 med fattige 14,6 mm.

Minusdagar

Temperaturane var naturleg nok aukande utover månaden. Til slutt strekte termometeret seg opp mot 13 grader, med nøyaktig 13 blank i Mauranger som bestenotering. I fyrste halvdel av mars vart det derimot registrert eit assortert utval av minusdagar. 4,6 kuldegrader på Husnes den 8. mars var det lågast gradstokken viste.

Snittet for året er 1,72 grader, målt i Uskedalen. Det er betydeleg kaldare enn for eitt år sidan, då snittet låg på 4,65. Men ser ein berre på mars, så kan Meteorologisk institutt melda at snittet for heile landet var 1,7 grader over normalen for perioden 1991-2020.

Målestasjonar

Oversikten viser noteringane til følgjande målestasjonar: Ølve (Henrik Barthel), Hatlestrand (Ole Femsteinevik), Austrepollen (Anders Gjerde), Rosendal-Eik (Jan Eik), Rosendal-Vang (Kvinnherad Elektro), Omvikdalen (Olav Karstein Hjelmeland), Matre (SKL), Uskedalen (Kurt Haugland), Husnes (Hydro), Valen (Jarle Håvik) og Sæbøvik (Harald Særsten).

Snitt-temperatur totalt pr. mars:

20211,72

20204,65

20193,83

20181,79

20173,43

20162,54

20154,0

20145,0

20130,2

20123,6

20112,3

Kjelde: Kurt Haugland, Uskedalen