Høg temperatur på matmøte

På eit møte førre måndag kom det tydeleg fram kva innbyggjarane i Ølve meiner om å mista produksjonskjøkenet på alderspensjonatet.

Møtet var i utgangspunktet meint for dei pårørande, og var såleis ikkje annonsert. Likevel møtte kring 30 personar. Tema var kva som skal skje med kjøkenet på alderspensjonatet, etter at Mattilsynet ikkje lenger vil godkjenna det.

Kommunen stilte med sektorleiar Bjørg Wangensten og Ellen Korsvold, einingsleiar for heimetenester nord, samt Finn Ove Solberg som er kjøkensjef på Husnestunet og einingsleiar for kjøkendrifta. Grenda er kjent med at stemninga til dels var amper, noko Malena Aasen stadfesta då eldrerådet drøfta saka i går.

– Det var stor oppstandelse, for å seia det mildt. Det trengs nok eit nytt folkemøte i Ølve, fortalde ho.

Aasen presenterte så eit sjølvskrive referat frå møtet.

– Eg har skrive to versjonar; fyrst eitt i harnisk og så eit roleg, sa ho før ho la fram det siste.

 

Sakna teikningar

Aasen opplyste at møtet skulle vera nøytralt, og belysa forskjellane på lokalt produksjonskjøken og avdelingskjøken med mat laga på Husnestunet.

– Sektorleiar Wangensten gav tydeleg uttale om at ho ville gå inn for kun avdelingskjøken i Ølve. Tilbakemeldinga frå salen var eintydig: Ølve skal ha både produksjonskjøken og avdelingskjøken. Det var folk til stades som tilbydde seg å skyta ut tomta gratis, sa Malena Aasen.

Sektorleiaren hadde vist fram teikningar for korleis eit avdelingskjøken kan sjå ut. Teikningar for produksjonskjøken hadde ho ikkje tilgjengeleg. Ifølgje Aasen vart difor konklusjonen at det må haldast eit folkemøte der reelle teikningar og kostnadsoverslag for begge alternativa vert lagt fram. Då ynskjer ein også at politikarane vert inviterte.

Til slutt bydde kjøkensjefen på kok/kjøl-mat frå Husnes.

– Var maten god? undra Øyvind Skogseth.

– Det var det delte meiningar om, men maten såg litt kjedeleg ut, vurderte Malena Aasen.

Ho la til at eldre folk kan mista matlysta, og at det difor er ekstremt viktig at ein serverer mat som ser god ut og luktar godt

– Mat er medisin og mat er glede. Noko som eldre menneske på institusjon har å sjå fram til, er eit velsmakande måltid. Eg meiner maten er best når han er nykokt, sa ho.

 

Søkja om midlar

Eldrerådet bed no kommunen søkja om statlege midlar til nytt produksjonskjøken. Dei bed også om at ei utgreiing av kjøken på alle institusjonane vert fremja som politisk sak, slik kommunestyret vedtok i førre periode.

– Men vedtaket vart aldri følgd opp. Vi kan spørja ordføraren kva tid det vert fremja sak, føreslo Svein I. Opdal.

Vidar Ask har elles lese kva sentrale myndigheiter seier om kjøken på institusjonane.

– Det står veldig tydeleg at lokalprodusert mat bør ein halda på, spesielt tradisjonsmat som dei eldre har eit forhold til. Alt tyder på at den beste løysinga er eit lokalt kjøken, slo han fast.