Har utsett seriestarten i barne- og ungdomsfotballen

I vekene som kjem skulle barne- og ungdomsfotballen endeleg ha rulla igjen rundt om i fylket. No har NFF Hordaland bestemt seg for å utsetja seriestarten.

Regjeringa sin plan for gjenopning av samfunnet vart kommunisert ut 6. april. Med bakgrunn i planen har fotballkretsen bestemt seg for å utsetja seriestarten for barn og ungdom.

– Slik planen ser ut no, vert det ikkje mogleg for barn og ungdom å konkurrera på tvers av kommunegrenser før tidlegast i midten av juni. Dette medfører at vårt tradisjonelle serie- og turneringsspel for barn og ungdom ikkje kan gjennomførast som planlagt og ynska, skriv NFF Hordaland i ei pressemelding og held fram:

– Med bakgrunn i dette er difor seriestart i Hordaland utsett inntil vidare, og terminlister annullert og fjerna frå fotball.no.

Informasjonsmøte

NFF Hordaland vil dei nærmaste dagane vurdera korleis dei skal innretta seg for å kunna tilby klubbane i fylket mest mogleg aktivitet, innanfor dei gjeldande retningslinjene.

– Vi vil utgreia alternative løysingar for kampaktivitet. Og tek sikte på å gjennomføra eit digitalt informasjonsmøte for klubbleiarar tysdag 20. april, skriv NFF Hordaland.