Skulle selja nausttomt – oppdaga at byggjegrensa var flytta

Då Svein Helge Eide i vinter skulle selja nausttomta si på Halsnøy, la han merke til at kommunen hadde flytta grensa for strandsona, slik at det ikkje lenger er å lov å byggja der. Kommunen vil heller ikkje gje dispensasjon.

Attende i 1998 kjøpte Svein Helge Eide ei nausttomt av slekt på Halsnøy. Tomta ligg nede ved moloen på Eidsvik, nærare bestemt på Røysaneset. Det vart i 2004 laga ein reguleringsplan for fem nausttomter i området, og inkludert i planen var òg tomta til Eide. Men nyleg fekk han seg ei stor overrasking.

– I vinter ringte ein venn av meg og ville kjøpa nausttomta. Det var då eg oppdaga inne på Kartverket at noko ikkje stemte. Det var trekt ein strek bakom mi tomt, og den var difor ikkje byggjeklar, fortel han til Grenda.

Han legg ikkje skjul på at han er frustrert over det han karakteriserer som ein «ugrei framgangsmåte» frå kommunen sin side.

– Eg betalar eigedomsskatt for denne tomta som no skifter verdi frå 3-400.000 kroner til ingen ting, viss dette blir vedteke. Det er ganske frustrerande å ha ein slik kommune som ikkje informerer oss vanlege folk om store forandringar på tomter som vi eig, kommenterer han.

Vurdera alle omsyn

«Streken» vart flytta i samband med den nye kommuneplanen i 2018. Liknande saker har råka ganske mange i Kvinnherad, og politikarane har lufta problemet ved fleire høve både i formannskapet og forvaltningsutvalet. Svein Helge Eide har søkt om dispensasjon frå kommuneplanen, og saka kjem opp i forvaltningsutvalet no på onsdag. Men kommunedirektøren innstiller på å ikkje gje slik dispensasjon frå byggjegrensa mot sjøen.

«Sjølv om området er regulert tidlegare, har nye retningsliner for allmenn bruk av strandsona, ført til at dette må vurderast og eventuelt takast inn i planen. Dette kan best gjerast gjennom ein heilskapleg prosess, der alle omsyn vert vurderte, og då gjennom ein endring av planen», står det i sakspapira.

Bed om synfaring

Dette stiller Svein Helge Eide seg uforståande til. Han reagerer dessutan på at kommunen overstyrer ein gyldig reguleringsplan på denne måten. Ikkje minst stussar han over at fem gyldige tomter i reguleringsplanen, er endra til berre tre i kommuneplanen.

«Tomtene i det aktuelle området er ikkje til sjenanse for ålmenta. Faktisk vert det betre tilgjenge for ålmenn ferdsel viss sti/veg kjem på oppsida av tomtene», skreiv han i ein e-post til avdelingsleiar Natalie Martins Sæberg søndag kveld.

Eide oppmodar om at politikarane kjem på synfaring før dei gjer vedtaket sitt. Han tilrår dessutan at kommunedirektøren utdjupar kvifor ho ikkje meiner fordelane ved ein disposisjon er større enn ulempene.

«Saka er no ferdig frå administrasjonen sin side, og vi kan ikkje gå inn i noko vidare utgreiing enn det som står i sakspapira», svarar Natalie Martins Sæberg.