«Kvinnherad Arena og ynskt hall i Rosendal kan ikkje samliknast»

 

I ein reportasje i Kvinnheringen sist torsdag under tittelen «Delte meiningar blant politikarane om hallstorleik i Rosendal» har nokre politikarar uttalt seg om Rosendal Turnlag sitt ynskje om fleirbruks friidrettshall og utandørs symjebasseng i bygda.

Ein slik hall må ha ein storleik på 51 x 96 m, og enkelte sår tvil om realismen bak ein slik stor hall. Dei hevdar av at hallen skal «matcha» Kvinnherad Arena,  og dei tviler såleis på realismen og økonomien i hallynsket til turnlaget - basert ut frå kostnadane til Kvinnherad Arena. Vi vil poengtera at Kvinnherad Arena og ynskt hall i Rosendal, korkje kan samliknast bruks- eller prismessig.

Vi i Rosendal Turnlag ynskjer difor slett ikkje å byggja ein tilsvarande hall, eller noko som konkurrerer med Kvinnherad Arena. Tvert i mot ynskjer vi å byggja ein hall som supplerer og byggjer opp under aktiviteten der, og samstundes tener idrettslaget, skulane og lokalsamfunnet sine behov i og rundt Rosendal. Likeins byr ein slik hall på moglegheiter og gjer Rosendal, og Kvinnherad kommune, meir attraktiv å reisa til.

I samtale med våre samarbeidspartnarar og velgjerarar har valet falle ned på ein fleirbruks friidrettshall som den type hall som gjev oss den fleksibiliteten vi treng for variert allsidig bruk. Ein friidrettshall kan difor aktivera langt fleire ungdomar samstundes, og ein får svært mykje aktivitet for pengane.

Rosendal Turnlag har elles som ambisjon å auke laget si satsing på idrettsturisme (treningsleirar for ulike idrettslag) og ein fleirbrukshall vil styrke heilskapen i eit slikt tilbod vesentleg. Samstundes vil ein fleirbruks friidrettshall også kunne nyttast som ein kulturell arena ved behov (konsertar, seminar og andre arrangement).

Når det gjeld politikarane sin tvil om økonomien og kostnaden for friidrettshall i Rosendal (kr 112 millionar inkl. moms) og utandørs symjebasseng (kr 7,9 millionar inkl. moms med oppvarming frå sjø), så byggjer desse på pristilbod frå ulike spesialentreprenørar og tal frå Sverre Sørnes i Trond Mohn Stiftelsen, og elles tilsvarande realiserte hallar - Nes Arena, Jessheim - ferdigstilt 2015 til kr 67 millionar inkludert moms (prisjustert i samsvar med konsumprisindeksen til 2021-tal = kr 87 millionar inkludert moms) samt Ulsteinhallen, Ulsteinvik (ferdigstilt 2015) og Sparebanken Sør Amfi, Grimstad (ferdigstilt 2017)). For øvrig ligg dei årlege driftsutgiftene ved Sparebanken Sør Amfi, og dei andre nemnde hallane på omlag kr 2,2 - 2,5 millionar årleg.

Vi vonar at dette syner at hallynsket til Rosendal Turnlag er både fornuftig og realistisk, så vel økonomisk og på anna vis. Vi er i det heile opptekne av å vera edruelege og realistiske i arbeidet vi legg ned og har forståing for at det er mange om beinet i ein avgrensa kommuneøkonomi. Vi understrekar at idrettslaget ikkje ynskjer at arbeidet skal resultera i færre sjukeheimsplassar eller avgrensingar i andre viktige kommunale tenester, men tillét oss samstundes også å peika på betydninga av gode oppvekstvilkår for barn og unge. Idrettsleg aktivitet er her udiskutabelt av svært stor verdi!

 

Jostein Hatteberg

Hovudstyreleiar Rosendal Turnlag