«Det må dyrkast mat på jorda, Bollestad!»

Koronapandemien har ført til at ei matvarekrisa truar deler av verda.

Det er vorte vanskelegare og dyrare å frakta matvarer på tvers av landegrensene. Fleire store eksportørar av viktige matvarer som ris og kveite, har innført eksportforbod, fordi dei treng varene dei produserer sjølv.

Arbeidsledigheit og pengemangel som følgje av pandemien i fattige land, avgrensar og tilgangen på mat. Denne situasjonen er ei alvorleg påminning om viktigheita av å produsera mest mogeleg mat til eigne innbyggjarar, og dermed også redusera presset på matressursane globalt.

Saman krev me difor at mat må verta ein endå viktigare del av vår beredskap. For å auka sjølvforsyningsgraden må alle med!

• All dyrka mark må nyttast til matproduksjon.

Lønsemda på særleg dei mindre bruka i fylket, som ikkje har same mogelegheit til å ta ut inntekt frå produksjonen, må difor aukast. Nasjonal mat-tryggleik treng ei styrking av Vestlandsbonden, ikkje ei svekking slik Solberg-regjeringa har bidrege til, med prioritering av dei store bruka.

• Dyrka jord må vernast, og ny jord må dyrkast.

Artikkelen held fram under annonsen.

Berre ca. 3 % av arealet i Norge er dyrka jord. Det må difor på plass eit nasjonalt jordvern for å ivareta den avgrensa ressursen som matjorda er. Like viktig er at det vert lagt til rette for og stimulert til auka nydyrking. I dette bildet er det heilt uakseptabelt at byråkratiet i Miljødirektoratet, utan synfaring, fattar vedtak utan klagerett, og overkøyrer Kvinnherad kommune og eit samla Folgefonna Nasjonalparkstyre, i å gje løyve til at unge bønder skal få dyrka jorda og produsera mat.

Dette er også eit bidrag til matberedskapen vår.

Me krev difor at Mat og landbruksministeren kjem på banen og snarleg avklarar:

1. Er det god matberedskap og nekta unge bønder som vil gjendyrka arealet på garden, og dermed bidra til auka matproduksjon?
2. Er det i tråd med demokratisk styring at byråkratiet i Miljødirektoratet kan fatte endeleg vedtak, utan klagerett, på tvers av kommune og eit samla Nasjonalparkstyre?

 

Sigrid Brattabø Handegard. Sentralstyremedlem SP

Benthe Bondhus. Leiar Kvinnherad SP