Byr på ein sosial, aktiv og koronavenleg påske

Gjennom «Den store påskekampen» legg ungdomslosane i Kvinnherad til rette for at ungdomane skal finna på kjekke aktivitetar saman, sjølv om det er korona.

– Det er rett og slett eit aktivitetstilbod til ungdomen som er tilpassa smittereglane så godt som mogleg, seier ungdomslos Maria Solheim Thorsen.

Saman med kollega Sigurd Naterstad har Maria Solheim Thorsen jobba fram eit rikt aktivitetstilbod til Kvinnherad-ungdomen denne påska. Frå 25. mars til 11. april kan nemleg ungdomen, innanfor dei gjeldande koronarestriksjonane, samla seg i mindre grupper og finna på kjekke ting saman i heile kommunen.

– Vi har laga mange aktivitetar tidlegare, men som vi har måtta avlysa på grunn av restriksjonane. No har vi spelt på lag med skulane slik at dei har laga vennegrupper. Tanken er at ungdomane skal koma seg meir ut, og med vennegrupper kan dei gjera det innanfor same kohort i små grupper på mellom tre og fem, seier Maria.

 

Tøft år

«Den store påskekampen» handlar om meir enn berre å samla dei faste venene i små kohortar. Det siste året har vore hardt for mange, og ved å stabla på beina eit innhaldsrikt, fast aktivitetsprogram vert det enklare for fleire å delta.

– Det har vore eit tøft år. Og vi merkar det veldig godt på ungdomen, dei har vore mykje innandørs det siste året, det har vore lite å finna på og mange aktivitetar har vore stengt ned. Vi ser at dei er demotiverte og at det er lite å finna på. Vi ser òg at mange ungdomar vegrar seg for å invitera heim, dei har høge skuldrar og trur det er store forventningar til det å invitera vener heim. Ved å laga ferdige aktivitetar vert terskelen lågare for å finna på ting saman, seier Thorsen.

 

17 aktivitetar

Ungdomane melder seg på saman med si gruppe til dei aktivitetane dei har lyst til å vera med på. Og det er rikeleg å velja i. Maria og Sigurd har nemleg laga ei lista på 17 ulike aktivitetar som kan gjennomførast dei neste vekene. På lista finn ein QR-quiz i naturen, tre-topptur, kosedag i sportsløypa, sykkeltur, overnatting under open himmel, TikTok-utfordring, geocaching, bading, fisking, bingo, teikneleik, fotball og matlaging.

– Så har vi laga ein Snapchat-konto som heiter Kvinnheradlosen, der dei ulike gruppene kan senda inn bevis på det dei har gjort. Dei som deltek på tre aktivitetar eller meir er så med i trekninga av premiar, seier Solheim.

 

God start

Allereie før påskeferien starta hadde mange ungdomar kasta seg med i aktivitetskampen. Maria håpar at dei mest sosiale ungdomane kan leggja ned ein innsats for å dra med seg dei meir introverte.

– Det har vore overveldande påmelding så langt. Så har eg ei oppmoding til dei mest sosiale ungdomane, send ei melding og prøv å dra med deg folk du ser ikkje er med. For dei som er meir introverte eller som har trekt seg ut det siste året, så er terskelen med å vera sosial høg. Då vert det vanskeleg for dei. Det å då få litt draghjelp er bra. Så har du ein ressurssterk gjeng, så må ein gje litt positivitet også til dei andre. Dette handlar om å samlast og mingla i lag, og vårt hovudmotto er at alle skal med, sluttar ungdomslosen.