Set av 14 millionar til gåver

Generalforsamlinga i Sparebank 1-stiftinga Kvinnherad bestemte at det totalt skal delast ut 14 millionar kroner ved dei to neste gåveutdelingane.

Generalforsamlinga gjekk dermed einstemmig inn for styret si innstilling. Noko som betyr at det skal delast ut sju millionar kroner til ålmennyttige føremål no i haust og igjen våren 2018.

– Vi har hatt eit godt år utbytemessigt, og kan visa til ei avkastning på aksjane våre i SR-bank på 2,25 kroner per aksje. Og med intensjonar om at vi skal tilbakeføra og investera utbytet vårt i nærmiljøet, fann vi rom til å auka gåvesummen med totalt fire millionar kroner frå i fjor, seier styreleiar Svein Arne Eidsvik frå Sparebank 1-stiftinga Kvinnherad.

 

Bryn inn i styret

Det er pengar som vil gagna lokale lag og organisasjonar i Kvinnherad til å halda fram sitt frivillige arbeid.

– I dei seks åra vi har halde på så har vi totalt delt ut 40 millionar kroner. Og inntrykket vårt er at dei som søker og får gler seg stort over gåvene, og at det bidreg til at dei framleis kan halda på og få realisert ei rekkje ulike prosjekt, seier Eidsvik.

Vidare på generalforsamlinga vart Yngve Bryn vald inn som nytt styremedlem i stiftinga, medan Jorunn Nordtveit går ut. Resterande styrebesetning og dei tre varamedlemmene tok attval.