Opnar pengesekken for ny hall

Sparebank1-stiftinga Kvinnherad har funne fem millionar til, som dei øyremerkar bygging av ny idrettshall på Husnes.

Med det aukar dei stiftinga sitt bidrag til ny idrettshall til heile åtte millionar kroner. Millionane er henta frå eit næringsfond som vart etablert i 2010, då SR-Bank kjøpte Kvinnherad Sparebank for 350 millionar kroner. Det meste av kjøpesummen vart betalt i form av aksjar i SR-Bank, og det er avkastinga av desse aksjane som er grunnlaget for gåvene Sparebank1-stiftinga Kvinnherad deler ut. Men det vart også laga til eit næringsfond, der det vart sett inn 10 millionar kroner.

– Desse er no, etter diskusjonar om korleis dei pengane skulle brukast og kva som var lov, overført til Sparebank1-stiftinga Kvinnherad. Med rente vart overføringa på 11,2 millionar, som me no også kan dela ut til gode formål. Ekstragåva på fem millionar kjem frå dette fondet, forklarte leiar i generalforsamlinga Torgny Nundal.

 

Storstove

– Me ser at det er eit stort behov for meir hallkapasitet i Kvinnherad. Kommunen treng ei storstove for idrett – og for kultur for den del, og det vil vera eit godt pluss for Husnes som regionsenter. Ein ny hall som denne vil vera for heile kommunen, sa styreleiar for stiftinga Svein Arne Eidsvik.

Idrettsrådet og Trio var representerte med leiarane Richard Erlandsen og Knut Prestnes då gåva vart kunngjort. Dei er begge med som idretten sine representantar i prosjektgruppa for hallen.

– Prosjektet har vore omsnakka i mange år, og ein hall til har vore eit sterkt sakn. Denne gåva løyser ut kommunale midlar og andre midlar, og er med det med på å realisera ny idrettshall, sa Prestnes.

 

120 millionar

– Eit så stort beløp til hallen er veldig gledeleg, rosar ordførar Peder Sjo Slettebø.

Den nye idrettshallen er kostnadsrekna til 120 millionar kroner. Over 20 millionar kjem tilbake i form av momskompensasjon. 29 millionar kjem frå spelemidlar, kommunen har sett av 35 millionar og stiftinga kjem altså med 8 millionar.

– Me jobbar med å få på plass den siste delen. Dersom alt fell inn slik me tenkjer, klarer me målet vårt om byggjestart i denne valperioden, altså før hausten 2019, kommenterer Slettebø.

 

Deler ut 15 millionar

Sparebank1-stiftinga Kvinnherad hadde generalforsamling 7. juni og vedtok mellom anna at det skal delast ut 15 millionar kroner i gåvemidlar.

– Det blir utdeling av 7,5 millionar på utdelingsrunden i haust, og like mykje neste vår, opplyser Svein Arne Eidsvik.

Med seg i styret for Sparebank1-stiftinga Kvinnherad har han nestleiar Synnøve Solbakken og styremedlemmene Gunnar Våge og Magnhild Haugland. Jan Magnus Aasen, Toril Lyngnes og Rannveig Hjelmeland er varamedlemmer.