Tung laurdag for 15-åringane

Kampen for å avgjera seriemeisterskapen for 3. divisjon skulle utifrå tabellane vera ein kamp mellom to jamne lag. Det vart det ikkje.

Det var ein bonuskamp på slutten av ein god sesong. Som vinnar av sin avdeling skulle Uskedal/Rosendal G15 møta Smørås 2 til kamp om kven som kan smykka seg med tittelen seriemeister i 3. divisjon. Det var ein tittel Smørås hadde så lyst på at dei like godt biffa opp 3. divisjonslaget sitt med sju spelarar frå 1. divisjonslaget. Då vart det ikkje mykje til jambyrdig kamp.

Allereie i første minuttet tok Smørås 2 leiinga, og dobla to minutt etter. Etter fem minutt reduserte Mathias Børve til 1-2 og gav vertane eit lite håp om ein spennande kamp, men bergensarane malte Uskedal/Rosendal i stykker. 1-7 til pause vart til 1-13 ved full tid, og gutane sprang skuffa rett i garderoben ved kampslutt.

 

God sesong

Trenar Tommy Eidsvik kunne blitt meir enn halvmuggen av gjestene si prioritering til kampen, men valte heller å sjå på det med andre auge.

– Dagens kamp er det ikkje mykje å seia om, men sesongen har vore bra. Gutane har prestert bra heile året, men poengfangsten har vore spesielt god i haust. Me har tatt 31 poeng på 12 kampar i haust, og då vann me avdelinga vår, oppsummerer han.

– Me har dabba litt av i prestasjonane, men me har ein god og brei stall, og fått utbyte av det når me får skadar. Gutane har 15 eller meir på trening året gjennom, og det er det ikkje alle som kan seia at dei har. Eg har lyst å halda fram med å trena gutane ut våren, og jobba oss fram mot Norway Cup, legg han til.

Han meiner laurdagens kamp viser at dei må opp i nivå og prestasjon.

– Sjølv om me møter sju-åtte 1. divisjonsspelarar her, så er dei like gamle som oss. Det blir feil å fokusera på det, det er treningar og talent det er snakk om. I dag har me nervane langt utpå, og klarer ikkje å prestera. Og så er det er eit godt fotballag me møter, sluttar Eidsvik