Arkeologisk funn vekker oppsikt

Trebitane som vart funne i ei myr på Ask på Hatlestrand har vekt stor interesse i arkeologiske krinsar. Mykje tyder på at det dreia seg om ein båt frå vikingtida.

Saken, som vart presentert i Grenda 27. april, handlar om at Johannes Ask på 80-talet fant nokre trebitar på jordet sitt då han drenerte ei myr. Han tok opp dei litt over éin meter lange bitane og la dei til side. Då nevøen Terje Ask overtok garden fatta han interesse for bitane, og så byrja historia å rulle.

Arkeolog og konservator på Bymuseet i Bergen, Ole Mikal Olsen Ramsøy er oppglødd over funnet som er gjort, og han meiner at det minner sterkt om båtstamnar frå den typen som er kjent frå vikingtida.

– Eg held ein knapp på at det stammer frå ein båt, og det vil overraska meg om det ikkje er frå vikingtida. Vi veit at dette var ein måte dei bygde på, der dei samla stamnane og sidene mot kvarandre – akkurat som sjølve båtborda var i stamnen – på ein litt spesiell og gjerne litt tungvint måte, analyserer arkeologen.

 

Båt som offer

Olsen Ramsøy har så langt berre vurdert funnet ut frå bileta som var prenta i Grenda.

– Byggemåten er karakteristisk for vikingtida, men om det også vart nytta i middelalderen, det veit vi ikkje fordi det er gjort særs få funn frå denne epoken, kommentere arkeologen.

Det er veldig tidleg i arbeidsfasen, og arkeologane har ikkje vore og studert funna enda, men Olsen Ramsøy fortel litt om kva funnet potensielt kan vera.

– Det eksisterer også døme på at ein nytta båt som offer, men om det har vore tilfellet her, det får vi sjå nærare på. Det å ofra ting i våtområde går langt tilbake i tid, fortel han.

Forskjell i funna

Han opplyser også at han har merka seg at dei to bitane har litt forskjellig utforming.

– Den eine biten minner litt om stamnen som er i ein Oselvar, medan den andre er meir typisk frå vikingtida, kjem det frå arkeologen.

Krumminga på dei fortel også noko om storleiken på den potensielle båten.

– Hadde det vore til ein mindre båt enn færing, så hadde det nok vore meir krumma, så det er teikn som tyder på at det har vore til eit større skip, er analysen til Olsen Ramsøy.

Det at garden Ask ligg på omkring 130 moh er nødvendigvis ikkje noko som talar imot at det er ein båt heller.

– Båtar kan ein bygge over alt så lenge det er grei tilgang til sjøen. Om ein ser på til dømes Bjørkedalen i Møre og Romsdal, kor dei har bygd båtar i mange hundre år, så er det fleire kilometer til sjøen, og det er ikkje noko hinder der, samanliknar han.

Arkeologen er veldig spent på kva som skjer vidare med funnet og kva analysane vil syna.

– No ligg ballen hjå fylkeskommunen, og dei vil nok ta fatt på jobben ganske snart. Det er ikkje ofte det dukkar opp slike funn, så dette er særs spanande, sluttar Olsen Ramsøy oppglødd.